Senat komıteti konstıtýtsııalyq merzimderdi esepteý máselelerin qamtyǵan qujatty talqylady
ASTANA. 17 maýsym. QazAqparat - Búgin Parlament Senaty Konstıtýtsııalyq zańnama, sot júıesi jáne quqyq qorǵaý organdary komıtetiniń keńeıtilgen otyrysy bolyp ótti. Onda «Qazaqstan Respýblıkasynyń keıbir konstıtýtsııalyq zańdaryna konstıtýtsııalyq merzimderdi esepteý máseleleri boıynsha ózgerister men tolyqtyrýlar engizý týraly» zań jobasy talqylandy.
Atalǵan zań jobasy «Konstıtýtsııalyq merzimderdi esepteý máselesi boıynsha Qazaqstan Respýblıkasy Konstıtýtsııasynyń normalaryn resmı túsindirý týraly» Konstıtýtsııalyq Keńestiń 2012 jylǵy 13 sáýirdegi normatıvtik qaýlysyn iske asyrý maqsatynda ázirlengen. Bul rette zań jobasy jekelegen konstıtýtsııalyq zańdarda kózdelgen konstıtýtsııalyq merzimderdiń bastalýy men aıaqtalýyn esepteý tártibin belgileý qajettiginen týyndaǵan. Osyǵan baılanysty «QR saılaý týraly», «QR Parlamenti jáne onyń depýtattarynyń mártebesi týraly», «QR Konstıtýtsııalyq keńesi týraly» konstıtýtsııalyq zańdaryna ózgerister engiziletin bolady.
