Senat komıteti Qazaqstan men Reseı arasyndaǵy munaı jetkizýdegi saýda-ekonomıkalyq yntymaqtastyq týraly kelisimdi talqylady
ASTANA. 5 naýryz. QazAqparat - Búgin Parlament Senaty Ekonomıkalyq damý jáne kásipkerlik komıtetinde «Qazaqstan men Reseı arasyndaǵy Qazaqstan Respýblıkasyna munaı jáne munaı ónimderin jetkizý salasyndaǵy saýda-ekonomıkalyq yntymaqtastyq týraly úkimetaralyq kelisimdi ratıfıkatsııalaý týraly» zań jobasy talqylandy. Bul týraly Senattyń baspasóz qyzmetinen habarlandy. Atalǵan Kelisim 2010 jylǵy 9 jeltoqsanda Máskeýde jasalǵan bolatyn. Kelisimniń negizgi maqsaty - Qazaqstan Respýblıkasyna munaı jáne munaı ónimderin jetkizý salasyndaǵy saýda-ekonomıkalyq yntymaqtastyq máselelerin retteý bolyp tabylady.
Kelisimniń sharttarymen Qazaqstan Respýblıkasyna munaı ónimderin bajsyz jetkizý kezinde týyndaıtyn, Reseı Federatsııasynyń bıýdjetine túspeıtin kiristerdi keıin óteý úshin bizdiń eldiń aýmaǵynan Keden odaǵynyń keden aýmaǵynan tysqary jerge munaı ónimderin eskporttaýdy júzege asyrýǵa baılanysty somalardy Reseı Federatsııasynyń bıýdjetine Qazaqstan tarapynyń esepteýi men tóleýi tártibin (ádistemesin) aıqyndaý kózdeledi.
Budan bólek, Qazaqstan men Reseı arasyndaǵy Qazaqstan Respýblıkasyna munaı jáne munaı ónimderin jetkizý salasyndaǵy saýda-ekonomıkalyq yntymaqtastyq týraly úkimetaralyq kelisimge ózgerister engizý týraly hattama 2012 jylǵy 19 qyrkúıekte Pavlodarda jasalǵan bolatyn. Hattamamen negizgi Kelisimniń 6 jáne 7-baptaryna ózgerister engiziledi. Oǵan sáıkes Qazaqstan Respýblıkasynyń ishki qajettilikterin qanaǵattandyrý úshin Qazaqstan Respýblıkasyna munaı ónimderin jetkizý eki memlekettiń aýmaqtarynda munaı ónimderiniń bekitilgen ındıkatıvtik balanstarynyń parametrleri kóleminde Taraptardyń quzyretti organdarymen kelisilgen nomenklatýra boıynsha júrgiziledi.
Hattamamen Kelisimge engiziletin ózgerister 2013 jylǵy 31 jeltoqsanǵa deıin munaı ónimderiniń ishki naryǵyn qamtamasyz etý maqsatynda Pavlodar munaı-hımııa zaýytyna Reseı munaıynyń jáne Reseı óndirgen ashyq tústi munaı ónimderiniń kepildi túrde jetkizilýine yqpal etetin bolady.
Zań jobalary palatanyń qaraýyna jiberildi.
