Senat komıteti Qazaqstan men Reseı arasyndaǵy munaı ónimderin jetkizýge qatysty kelisimdi talqylady
ASTANA. QazAqparat - Bul týraly búgin Parlament Senaty Ekonomıkalyq saıasat ınnovatsııalyq damý jáne kásipkerlik komıtetiniń keńeıtilgen otyrysynda «2010 jylǵy 9 jeltoqsandaǵy Qazaqstan Respýblıkasynyń Úkimeti men RF Úkimeti arasyndaǵy Qazaqstan Respýblıkasyna munaı jáne munaı ónimderin jetkizý salasyndaǵy saýda-ekonomıkalyq yntymaqtastyq týraly kelisimge ózgerister engizý týraly hattamany ratıfıkatsııalaý týraly» zań jobasy talqylandy.
Toqtala ketetin jaıt, Qazaqstan men Reseı arasyndaǵy elimizge munaı jáne munaı ónimderin jetkizý salasyndaǵy saýda-ekonomıkalyq yntymaqtastyq týraly kelisim 2010 jyly qabyldanyp, keıinnen 2013 jyldyń 3 sáýirinde qosymsha hattamasy ratıfıkatsııalanǵan bolatyn. Sońynan ekijaqty kelisimniń sharttary 2015 jyldyń 1 qańtaryna deıin taǵy uzartyldy. Osy rette, ekijaqty kelisimdi júzege asyrý merziminiń aıaqtalýyna baılanysty, taraptar Eýrazııalyq ekonomıkalyq keńestiń kelisimsharty aıasynda 2016 jylǵy 1 qańtarǵa deıin munaı jáne munaı ónimderiniń ortaq naryǵyn qalyptastyrý tujyrymdamasyn bekitedi jáne 2018 jylǵy 1 qańtaryna deıin EAEO munaı jáne munaı ónimderiniń ortaq naryǵynda baǵdarlama jasaýlary qarastyrylǵan. Osyǵan oraı, taraptar 2024 jylǵy 1 qańtarǵa deıin baǵdarlamadaǵy barlyq is-sharalardy iske asyrýy jáne 2025 jylǵy 1 qańtarǵa deıin EAEO munaı jáne munaı ónimderiniń ortaq naryǵyn qurý týraly halyqaralyq kelisimshart jasaýlary qarastyrylyp otyr. Bul rette Eýrazııalyq ekonomıkalyq odaq týraly shartty eskere otyryp, taraptardyń Qazaqstan Respýblıkasyna Reseıden munaı jáne munaı ónimderin tasymaldaý máseleleri qoldanystaǵy kelisimshart aıasynda retteletin bolady. Sonymen qatar, 2014 jylǵy 24 mamyrda qol qoıylǵan hattamaǵa sáıkes, qoldanystaǵy kelisimdi júzege asyrý merzimi 2019 jyldyń 1 qańtaryna deıin uzartylǵan bolatyn. Osy merzim aıaqtalǵannan keıin, eger kelisimniń bastapqy qoldanylý merzimi biterden keminde 6 aı buryn taraptardyń eshqaısysy ony toqtatý týraly nıetin ekinshi tarapqa jazbasha túrde habardar etpese, hattama avtomatty túrde bes jylǵa, ıaǵnı 2024 jyldyń 1 qańtaryna deıin uzartylady.
