Senat komıteti qarjy pıramıdalarynyń jolyn kesýge baǵyttalǵan qujatty talqylady
ASTANA. 23 jeltoqsan. QazAqparat - Búgin Parlament Senaty Konstıtýtsııalyq zańnama, sot júıesi jáne quqyq qorǵaý organdary komıtetiniń keńeıtilgen otyrysynda «Qazaqstan Respýblıkasynyń keıbir zańnamalyq aktilerine qarjylyq (ınvestıtsııalyq) pıramıdalardyń qyzmetine qarsy is-qımyl máseleleri boıynsha ózgerister men tolyqtyrýlar engizý týraly» zań jobasy qaraldy. Eske sala keteıik, atalǵan qujat buǵan deıin Senattyń jalpy otyrysynlda birinshi oqylymda talqylanǵan bolatyn.
Zań jobasy Qazaqstan Respýblıkasynyń aýmaǵynda qarjylyq (ınvestıtsııalyq) pıramıdalardyń qyzmetiniń jolyn kesý jáne oǵan tyıym salý jónindegi sharalar keshenin qarastyrady. Zań jobasy Memleket basshysynyń tapsyrmasyna oraı ázirlengen. Bul rette qujat arqyly qarjylyq pıramıdalardyń jolyn kesý, ony boldyrmaý boıynsha sharalar keshenin qabyldaý, bastysy, Qazaqstan aýmaǵynda olardyń qyzmetine zańnamalyq deńgeıde tyıym salý kózdeledi. Atap aıtqanda, qarjylyq pıramıdalar qurǵany, onyń qyzmetin uıymdastyrýǵa, ony basqarýǵa qatysty qylmystyq jaýapkershilik qamtylady. Al qarjylyq pıramıdalardyń qyzmetin jarnamalaǵany úshin ákimshilik jaýapkershilik kózdeledi. Sondaı-aq zań jobasymen qarjylyq (ınvestıtsııalyq) pıramıdalardyń uǵymyn naqtylaý qarastyrylady. Ondaı qyzmetterdiń jarnamalanýyna zańnamalyq negizben tyıym salynatyn bolady.
Senat komıteti qujatty palatanyń jalpy otyrysyna shyǵarý týraly qaýly qabyldady.
