Senat komıteti Ǵarysh apparattaryn basqarýdyń jer ústi kesheninde boldy
ASTANA. 9 qarasha. QazAqparat - Parlament Senaty Ekonomıkalyq jáne óńirlik saıasat komıtetiniń Ǵarysh apparattaryn basqarýdyń jer ústi kesheninde (Aqmola oblysy, Aqkól qalasy) búgin bolǵan kóshpeli otyrysynda ǵarysh qyzmetin zańnamalyq turǵyda qamtamasyz etý máseleleri talqylandy,
dep habarlaıdy Senattyń baspasóz qyzmeti.
«Ǵarysh qyzmeti týraly» jáne «Qazaqstan Respýblıkasynyń keıbir zańnamalyq aktilerine ǵarysh qyzmeti máseleleri boıynsha ózgerister men tolyqtyrýlar engizý týraly» zań jobalaryn talqylaýǵa tóraǵa orynbasary Aleksandr Sýdın qatysty.
Elimizdiń Ulttyq ǵarysh agenttiginiń (Qazǵarysh) basshysy T.Musabaev depýtattarǵa ǵarysh salasyn damytý baǵdarlamasynyń strategııalyq baǵyttary týraly aıtty jáne Agenttiktiń «KazSat-2» jáne «KazSat-3» baılanys jáne taratýdyń, ǵarysh monıtorıngi ulttyq júıelerin jasaý, «Baıqońyr» ǵarysh aılaǵynda «Báıterek» ǵarysh zymyrany keshenin salýdaǵy qyzmeti týraly habardar etti.
Talqylaý barysynda osy saladaǵy qoldanystaǵy zańnama Qazaqstandaǵy ǵarysh qyzmetin damytý úshin quqyqtyq negizdi qamtamasyz ete almaıtyny týraly aıtyldy.
Ǵarysh qyzmeti týraly zań jobalaryn ázirleý jónindegi jumys toby músheleriniń pikirinshe, jobalardyń qabyldanýy ǵarysh qyzmeti salasyndaǵy qoǵamdyq qatynastardy quqyqtyq retteýdi júıeleýge, ony Qazaqstanda júzege asyrý úshin quqyqtyq negizdi bekemdeýge múmkindik beredi.
Іlespe zań jobasymen Azamattyq, Qylmystyq, Qylmystyq-is júrgizý, Jer, Bıýdjet, Salyq jáne Ákimshilik quqyq buzýshylyq týraly kodeksterge, sondaı-aq «Turǵyn-úı qatynastary týraly» jáne «Qazaqstan Respýblıkasyndaǵy memlekettik baqylaý jáne qadaǵalaý týraly» zańdarǵa ózgerister engiziletin bolady.
Otyrys aıasynda depýtattar jer ústindegi basqarý kesheniniń nysandarymen jáne jabdyqtarmen tanysty.
