Senat komıteti eńbek kóshi-qonyna qarsy is-qımyl týraly kelisimdi talqylady
ASTANA. 30 mamyr. QazAqparat /Qanat Mámetqazyuly/ - Búgin Senattyń Áleýmettik-mádenı damý komıtetinde «Úshinshi memleketterden kelgen zańsyz eńbek kóshi-qonyna qarsy is-qımyl jónindegi yntymaqtastyq týraly kelisimdi ratıfıkatsııalaý týraly» zań jobasy qaraldy.
Esterińizge sala keteıik, atalǵan kelisimge Keden odaǵy Úkimetteriniń basshylary Sankt-Peterborda 2010 jyly qarashada qol qoıǵan bolatyn. Qujatta úshinshi memleketterden kelgen zańsyz eńbek kóshi-qonyna qarsy is-qımyl jónindegi yntymaqtastyqtyń negizgi baǵyttary men túrleri belgilengen. Atap aıtqanda, kelisimde eńbek etý úshin zańsyz kóship-qonýshylardy anyqtaý jáne esebin alý, zańsyz eńbek kóshi-qony arnalary men oǵan járdemdesetin jáne onymen aınalysatyn qurylymdar men uıymdardyń jolyn kesý, kóship-qonýshylar kólemine monıtorıng júrgizý, eńbek etý úshin zańsyz kóship-qonýshylardy elden shyǵarý tetikterin jetildirý, sondaı-aq Keden odaǵy elderine zańsyz kirýshilerdi shekteý sharalaryn júrgizý kózdelgen.
Keńeıtilgen otyrysta sonymen birge «Kóship-qonýshy eńbekshiler men olardyń otbasy músheleriniń quqyqtyq mártebesi týraly kelisimdi ratıfıkatsııalaý týraly» zań jobasy da talqylandy.
