Senat komıteti Dúnıejúzilik bankten 1 mlrd dollar qaryz alýǵa baǵyttalǵan kelisimdi talqylady
ASTANA. QazAqparat - Búgin Parlament Senaty Qarjy jáne bıýdjet komıtetiniń keńeıtilgen otyrysy bolyp ótti. Onda depýtattar «Qazaqstan Respýblıkasy men Halyqaralyq Qaıta Qurý jáne Damý Banki arasyndaǵy Qaryz týraly kelisimdi (Makroekonomıkalyq basqarý jáne ekonomıkanyń básekege qabilettiligin arttyrý salasyndaǵy damý saıasatyn qarjylandyrý boıynsha birinshi kredıt) ratıfıkatsııalaý týraly» zań jobasyn talqylady. Kelisimge 2016 jyldyń 17 aqpanynda Astana qalasynda qol qoıylǵan.
Kelisimge sáıkes, Dúnıejúzilik bank Qazaqstanǵa makroekonomıkalyq basqarý jáne ekonomıkanyń básekege qabilettiligin arttyrý saıasatyn qarjylandyrý úshin 1 mıllıard dollar mólsherinde qaryz beredi. Qaryz qarajaty elimizdiń áleýmettik-ekonomıkalyq damýynyń negizgi basymdyqtaryn qoldaýǵa jáne Úkimettiń ekonomıkalyq yntalandyrý jáne ekonomıkalyq ósimge kómektesý jónindegi strategııalyq sharalaryn oryndaýǵa múmkindik beredi.
Qaryz negizinen aǵymdaǵy jylǵy bıýdjettiń tapshylyǵyn qarjylandyrýǵa baǵyttalady. Jalpy Qaryz Qazaqstanǵa 2,5 jyldyq jeńildik kezeńdi qosa alǵanda 20 jyl óteý merzimimen beriledi. Syıaqy mólsherlemesi birjolǵy qaryz somasynyń 0,25 paıyzy, rezervke qoıǵany úshin komıssııa jylyna qaryz boıynsha paıdalanylmaǵan teńgerimniń 0,25 paıyzyna teń bolady.
Zań jobasy palatanyń aldaǵy ýaqytta ótetin jalpy otyrysyna shyǵarylady.
