Senat komıteti buqaralyq is-sharalar ótkizý barysyndaǵy qaýipsizdikke qatysty zań jobasyn talqylady
ASTANA. QazAqparat - Búgin Parlament Senaty Konstıtýtsııalyq zańnama, sot júıesi jáne quqyq qorǵaý organdary komıtetiniń keńeıtilgen otyrysy bolyp ótti. Onda senatorlar «Qazaqstan Respýblıkasynyń keıbir zańnamalyq aktilerine sporttyq jáne sporttyq-buqaralyq, oıyn-saýyq mádenı-buqaralyq is-sharalar ótkizý kezinde qaýipsizdikti qamtamasyz etý máseleleri boıynsha ózgerister men tolyqtyrýlar engizý týraly» zań jobasyn ekinshi oqylym boıynsha talqylady.
Eske salaıyq, qujat sporttyq-buqaralyq, mádenı oıyn-saýyq jáne basqa da is-sharalaryn uıymdastyrýǵa, ótkizýge baılanysty quqyqtyq qatynastardy retteýge baǵyttalady. Máselen, ondaı sharalardy ótkizý úshin jergilikti atqarýshy organdar uıymdastyrý komıtetterin quratyn bolady. Olar sharalardy ótkizýge tartylǵan uıymdardyń qyzmetin úılestiredi. Jeke tulǵalardyń mádenıet, dene shynyqtyrý, sport salasyndaǵy quqyqtary men mindetteri aıqyndalyp, olardyń sharalarǵa barýy kezindegi tyıym salýlary men shekteýleri keńeıtiledi. Osyǵan baılanysty jeke tulǵalarǵa atalǵan sharalardaǵy minez-qulyqtyń, júris-turys qaǵıdalaryn buzǵany úshin ákimshilik jaýaptylyq engiziledi. Budan bólek, buqaralyq sharalar ótkiziletin oryndarǵa alkogol ónimderin, sonymen birge, metall jáne shyny qutydaǵy, pırotehnıkalyq jáne basqa da adam ómiri men densaýlyǵyna qaýip tóndiretin kez kelgen zattar men ónimderdi ákelýge tyıym salynady. Sonymen qatar, sharalar ótkiziletin ýaqytta áleýmettik, násildik, ulttyq, dinı arazdyqty qozdyrýǵa baǵyttalǵan, sol sekildi jeke tulǵalardyń quqyqtaryna nuqsan keltiretin plakattardy, emblemalardy, transporanttardy jáne ózge de kórnekti zattardy paıdalanýǵa tyıym salynady. Bundaı tyıym salýlardy buzǵany úshin jeke tulǵalarǵa jıyrma aılyq eseptik kórsetkish mólsherinde aıyppul salynady, ákimshilik jaýaptylyqqa tartylady. Talqylaýdan soń komıtet zań jobasyn palatanyń jalpy otyrysyna shyǵarý týraly ýaǵdalasty.
