Senat komıteti Azamattyq protsestik kodeks jobasyn talqylady
ASTANA. QazAqparat - Búgin Parlament Senaty Konstıtýtsııalyq zańnama, sot júıesi jáne quqyq qorǵaý organdary komıtetiniń keńeıtilgen otyrysy ótti.
Onda Qazaqstan Respýblıkasy Azamattyq protsestik kodeksiniń jobasy talqylandy. Kodeks jobasy aldaǵy ýaqytta ótetin palatanyń jalpy otyrysyna shyǵarylatyn bolady.
Jańa redaktsııadaǵy kodeks Qazaqstannyń quqyqtyq saıasat tujyrymdamasyn iske asyrý maqsatynda jáne Memleket basshysynyń sýdıalardyń VI sezinde qoıǵan mindetterin oryndaý úshin ázirlengen.
Qujat azamattyq-protsestik zańnamanyń jedeldigin arttyrýdy, sot isin júrgizýde bitistirý rásimderin belsendi qoldaný úshin ony jańǵyrtý arqyly jeke jáne zańdy tulǵalardyń konstıtýtsııalyq quqyqtary men bostandyqtaryn sotta tıimdi qorǵaýdy qamtamasyz etýdi kózdeıdi. Tutastaı alǵanda, kodekstiń erejeleri azamattardyń, memlekettiń jáne zańdy tulǵalardyń buzylǵan nemese daýlanyp otyrǵan quqyqtaryn, bostandyqtaryn jáne zańdy múddelerin qorǵaýdy qarastyrady. Ondaı múddelerdi qalpyna keltirý týraly azamattyq sot isin júrgizý talaptaryn oryndaýǵa, zańdylyqty saqtaýǵa, qoǵamnyń zań men sotqa kadir-qurmetpen qaraýdy qalyptastyrýǵa baǵyttalady.
Sonymen qatar azamattyq protseste advokatýranyń róli kúsheıip, medıatsııa ınstıtýtyn keńinen qoldaný da kózdelip otyr. Budan bólek, isterge advokattardyń qatysýymen bitistirýdiń jańa tásili retinde «daýdy partısıpatıvtik rásimmen qaraý» engizilmekshi. Bul daýǵa qatysýshylarǵa kelissózderdi advokattardyń belsendi qatysýy arqyly ótkizý múmkindigin qamtıtyn bolady.
