Senat kólik máseleleri jónindegi zań jobasyn birinshi oqylymda maquldady

Atalǵan qujattyń maqsaty kólik qyzmetin memlekettik retteý júıesin jáne tasymaldaý úderisin jetildirý bolyp tabylady. Sondaı-aq qujat boıynsha kólik salasyndaǵy quqyqtyq olqylyqtardy joıý jáne ulttyq kólik zańnamasyn halyqaralyq quqyqtyq normalarǵa sáıkes keltirý qarastyrylǵan. Zań jobasynyń úkimettik nusqasynda 280 túzetý qamtyldy. Májilistegi talqylaý barysynda onyń ústine 353 túzetý engizildi. «Qazirgi ýaqytta avtokólik salasynyń aldynda turǵan eń ótkir máseleniń biri avtokólik joldaryn salý jáne qaıta jańartý bolyp tabylady. Budan bólek avtokólik qatynasyna baılanysty jer telimderin satyp alý máselesi de ózekti. Mysaly, 2007-2009 jyldar aralyǵynda osyndaı jer telimderin satyp alýǵa bıýdjetten 11 mlrd. teńge jumsaldy. Osylardy eskere kele zań jobasynda jer ýchaskelerin berý tártibi naqtylanady. Atap aıtqanda, jol boıynda ornalasqan memlekettik menshiktegi jer telimderi tek ýaqytsha paıdalanýǵa beriledi. Budan bólek zań jobasynda avtojoldarǵa bólingen jolaqtarda jol servıs nysandaryn salýǵa tyıym salatyn túzetýler engizilip otyr», dedi Kólik jáne kommýnıkatsııa mınıstrliginiń jaýapty hatshysy Jeńis Qasymbekov.

Budan bólek túzetýler halyqaralyq, qalaaralyq qatynasta avtobýstarmen jolaýshylardy tasymaldaýǵa lıtsenzııa engizýdi qarastyrady. Jolaýshylardy temir jolmen tasymaldaýlardy basqarýdyń jol júrý bıletterin satý boıynsha avtomattandyrylǵan júıesine paıdalanýshylardyń qol jetkizýine múmkindik beredi. Sondaı-aq, temir jol vokzaldarynyń qyzmetin uıymdastyrýǵa, ulttyq teńiz tasymaldaýshysyn aıqyndaýǵa baǵyttalǵan normalar qamtylyp otyr. Birinshi oqylymda maquldanǵan zań jobasy, ekinshi oqylymǵa ázirleý úshin Ekonomıkalyq jáne óńirlik saıasat komıtetine tapsyrylady.