Senat Qytaıǵa avtomobıl júk tasymalyn damytýǵa arnalǵan qujatty maquldady
ASTANA. KAZINFORM – Búgin Senattyń jalpy otyrysynda «Qazaqstan Respýblıkasynyń Úkimeti men Qytaı Halyq Respýblıkasynyń Úkimeti arasyndaǵy halyqaralyq avtomobıl tasymaldary týraly kelisimdi ratıfıkatsııalaý týraly» Zańy maquldandy.
Zań Qazaqstan men Qytaı arasyndaǵy halyqaralyq avtomobıl tasymaldary týraly kelisimdi ratıfıkatsııalaýǵa baǵyttalǵan. Kelisim 2023 jylǵy 17 mamyrda Sıan qalasynda jasalǵan.
Senattyń Halyqaralyq qatynastar, qorǵanys jáne qaýipsizdik komıtetiniń málimetine qaraǵanda, qujattyń maqsaty – Kelisim taraptarynyń aýmaqtary arqyly avtomobıl júk tasymaldaryn ilgeriletý, avtomobıl kóliginiń qazirgi zamanǵy júıelerin damytý, aqparattyq tehnologııalardy endirý, sondaı-aq Qazaqstan men Qytaı arasyndaǵy tranzıttik-kóliktik áleýetti jáne saýda-ekonomıkalyq qatynastardy odan ári damytý úshin qolaıly jaǵdaılar jasaý.
Kelisimde jolaýshylar men júk tasymaly máseleleri, kólik quralynyń júrýine ruqsat berý ári odan bosatý sharttary, júrgizýshiler men kólik quralyna qoıylatyn talaptar, sondaı-aq saqtandyrý, salyq salý jáne ótkizý pýnktterinde baqylaý máseleleri reglamenttelgen.
Zań aqparattyq tehnologııalardy endirý, tasymaldaý jaǵdaılaryn jetildirý jáne Kelisim taraptarynyń aýmaqtary arqyly avtomobıl kóligimen júkterdi tasymaldaý kólemin ulǵaıtý úshin qolaıly jaǵdaılar jasaýǵa múmkindik beredi.
