Senat Qyrǵyzstanmen arada saýdany ulǵaıtýǵa arnalǵan qujatty maquldady
ASTANA. KAZINFORM – Búgin Senattyń jalpy otyrysynda «Qazaqstan Úkimeti men Qyrǵyzstan mınıstrler Kabıneti arasyndaǵy «Qarasý» jáne «Aq-Tilek» avtojol ótkizý pýnktteri aýdanynda ındýstrııalyq saýda-logıstıkalyq keshendi qurý jáne onyń qyzmetin retteý týraly kelisimdi ratıfıkatsııalaý týraly» Zańy maquldandy.
Kelisimniń maqsaty - Qazaqstan jaǵynan «Qarasý» jáne Qyrǵyz tarapynan «Aq-tilek» avtojol ótkizý pýnktteri aýdanynda ındýstrııalyq saýda-logıstıkalyq keshen qurý.
Senator Baýyrjan Qanıevtiń aıtýynsha, Qazaqstannyń Qyrǵyzstanmen ózara saýdasy qarqyndy damyp keledi. 2020 jyldan bastap eki el arasyndaǵy taýar aınalymy 2 esege ósip, 2023 jyldyń qorytyndysy boıynsha 1,6 mlrd AQSh dollaryna jetti.
«Eki eldiń memleket basshylary 2030 jylǵa deıin taýar aınalymyn eki esege ulǵaıtý jáne ony 3 mlrd AQSh dollaryna jetkizý boıynsha tapsyrma qoıyp otyr. Osyǵan baılanysty «Qarasý» jáne «Aq-Tilek» avtojol ótkizý pýnktteri aýdanynda ındýstrııalyq saýda-logıstıkalyq keshen qurý ekijaqty yntymaqtastyqty jandandyrý ári ózara taýar aınalymyn ulǵaıtýǵa, sonymen qatar úshinshi eldermen saýdany keńeıtý jáne halyqaralyq taýar óndirýshi júıelerge tıimdi yqpaldasý úshin qajetti qadam jasaýǵa baǵyttalǵan», - dedi depýtat.
Senattyń Ekonomıkalyq saıasat, ınnovatsııalyq damý jáne kásipkerlik komıtetiniń málimetinshe, ISLK qurýdyń jáne onyń jumys isteýiniń negizgi mindetteri - qoımaǵa jınaý, saqtaý, shoǵyrlandyrý, qaıta óńdeý, jańa taýarlar óndirý ári olardy halyqaralyq taýar ótkizýshi júıelerge tıimdi ıntegratsııalaı otyryp, odan ári ótkizý salasyndaǵy óndiristik kooperatsııany qamtamasyz etý. Sondaı-aq onda qysqa merzimdi ótkizý, logıstıka, saýda oryndaryn jalǵa alý, taýarlardy kóterme partııalar boıynsha shoǵyrlandyrý jáne qaıta bólý, tıeý jáne túsirý, eksporttyq-ımporttyq operatsııalar boıynsha qujattamalardy resimdeý, zańgerlik ári qarjylyq konsýltatsııalar qamtylady.
Kelisimge sáıkes ISLK-niń jalpy alańy 7,6 sharshy km quraıdy, onyń ishinde Qazaqstan bóliginiń alańy – 3,6 sharshy km, al Qyrǵyzstan bóliginiń alańy 4 sharshy km quraıdy.
Kelisimdi iske asyrýdan mynadaı ońtaıly nátıjeler eskerilgen:
- óndiristik kooperatsııa, jańa óndirister men jumys oryndaryn qurý;
- et jáne aýyl sharýashylyǵy ónimderin saqtaý jáne qaıta óńdeý úshin jaǵdaılar jasaý;
- logıstıka men kásipkerlik qyzmet obektilerin jaqsartý;
- jańa tehnologııalardy tartý;
- aýyl sharýashylyǵy óndirisin ártaraptandyrý, agroónerkásiptik keshen ónimderin ótkizý, saqtaý ári qaıta óńdeý;
- jańa taýarlardy óndirý jáne olardy halyqaralyq taýar ótkizý júıelerine tıimdi ıntegratsııalaı otyryp odan ári ótkizý.
