Senat Kıprmen arada sottalǵan adamdardy berýge qatysty zańdy maquldady

ASTANA. KAZINFORM — Búgin Senattyń jalpy otyrysynda «Qazaqstan Respýblıkasy men Kıpr Respýblıkasy arasyndaǵy sottalǵan adamdardy berý týraly kelisimdi ratıfıkatsııalaý týraly» Zań maquldandy.

Bul kelisimge 2024 jylǵy 25 naýryzda Astana qalasynda qol qoıyldy.

- Kelisimge sáıkes taraptar bas bostandyǵynan aıyrýǵa úkim shyǵarylǵan adamdarǵa qatysty jazany nemese onyń jazasynyń qalǵan merzimin óz memleketinde odan ári óteý úshin bir-birine sottalǵan adamdardy berýge mindeteledi. Qazaqstan tarapynan sottalǵan adamdardy berý týraly sheshimniń oryndalýyna jaýapty quzyretti organ retinde Qazaqstan Respýblıkasynyń Bas prokýratýrasy belgilenedi. Qujatta sottalǵan adamdardy berý jáne odan bas tartý úshin naqty negizder kózdelgen, - dedi senator Sovetbek Medebaev.

Sottalǵan adamdardy berý myna sharttar saqtalǵan kezde júzege asyrylady:

• ótelýge tıisti jazanyń qalǵan merzimi keminde alty aıdy qurasa nemese úkim belgilenbegen merzimge shyǵarylsa; 
• sottalǵan adamnyń kelisimi bolsa; 
• úkim shyǵarylǵan áreket nemese áreketsizdik ony oryndaýshy taraptyń zańnamasyna sáıkes qylmys sanalsa; 
• úkimdi shyǵarýshy da, oryndaýshy da taraptar sottalǵan adamdy berýge kelisse.

- Eger úkim shyǵarýshy tarap sottalǵandy berý óziniń egemendigine, qaýipsizdigine nemese qoǵamdyq tártibine nuqsan keltirýi múmkin dep eseptese, sottalǵan adam úkim boıynsha zalaldy ótemese, úkim shyǵarýshy tarapta berýge tıis adamǵa qatysty qylmystyq qýdalaý júzege asyrylyp jatsa, berýden bas tartylýy múmkin. Sonymen qatar aıta ketetin ereje, Kelisimniń 19-babynda Ýaǵdalasýshy taraptardyń árqaısysy óziniń ulttyq zańnamasyna sáıkes, ekinshi Ýaǵdalasýshy tarapty tıisti túrde habardar ete otyryp, sottalǵan adamǵa qatysty keshirim, raqymshylyq jasaı alady nemese jazany jeńildete alatyndyǵy kózdelgen, - dedi depýtat.

Aıta keteıik, qazirgi kezde Qazaqstan sottalǵan adamdardy berý týraly 20-dan astam memleketpen kelisim jasaǵan (olardyń ishinde – Úndistan, Túrkııa, Iran, Izraıl, Italııa, Ispanııa, Vengrııa jáne t.b. bar).

Eske salsaq, byltyr naýryz aıynda Astanada Kıpr Syrtqy ister mınıstriniń Qazaqstanǵa resmı sapary aıasynda Qazaqstan Respýblıkasy men Kıpr Respýblıkasy arasyndaǵy sottalǵan adamdardy berý týraly kelisimge qol qoıý rásimi ótti.