Senat qymbat dári-dármekke qol jetkizý problemasyn sheshýge baǵyttalǵan zańdy maquldady
ASTANA. KAZINFORM — Búgin Senattyń jalpy otyrysynda «Zııatkerlik menshik quqyqtarynyń saýda aspektileri jónindegi kelisimge tolyqtyrý engizý týraly hattamany ratıfıkatsııalaý týraly» Zańy maquldandy.
«Qarastyrylyp otyrǵan zań zııatkerlik menshik quqyqtarynyń saýda aspektileri boıynsha kelisimge tolyqtyrý engiziletin hattamany ratıfıkatsııalaýǵa baǵyttalǵan. Bul Hattama Dúnıejúzilik saýda uıymynyń Zııatkerlik menshik quqyqtarynyń saýda aspektileri jónindegi kelisimine (TRIPS kelisimi) tolyqtyrýlar engizýdi qamtıdy. Hattamaǵa sáıkes dárilik zattardy eksporttaý maqsatynda májbúrlep lıtsenzııalaýdy keńeıtilgen túrde qoldaný tártibi aıqyndalady. Bul tetik farmatsevtıka sektorynda óndiristik qýaty jetkiliksiz Dúnıejúzilik saýda uıymyna (DSU) múshe elderdiń qymbat dári-dármekterge qol jetkizý problemasyn sheshý úshin ázirlengen. Hattama DSU múshe memleketterge tótenshe jaǵdaı kezinde dárilik zattar boıynsha óndiristik qýaty jetkiliksiz bolǵan jaǵdaıda memleketti dárilik preparattardyń qajet kólemimen qamtamasyz etý jáne kómek alý úshin DSU-nyń basqa múshelerine júginýge quqyq beredi. DSU elderiniń músheleri patent ıesine mindetti túrde ótemaqy tólemeı, halyqtyń densaýlyǵyna eleýli qater tóngen jaǵdaılarda dárilik preparattardyń túpnusqa kóshirmelerin óndiredi nemese ákele alady», - dedi senator Aıgúl Qapbarova.
Osy Hattamany ratıfıkatsııalaý basqa memleketterge kómek kórsetý úshin biregeı dárilik preparatqa sheteldik patentti paıdalana otyryp, Qazaqstanda dárilik preparattar óndirisin uıymdastyrýǵa múmkindik beredi. Budan basqa, epıdemııa jaǵdaıynda Qazaqstan bul tetikti DSU-nyń basqa múshesi májbúrli lıtsenzııa boıynsha óndiretin qymbat turatyn dárilik preparattardy ımporttaý úshin paıdalana alady.
«Hattamany ratıfıkatsııalaý dárilik zattardy óndirý kezinde zııatkerlik menshik quqyǵyn qorǵaý máselelerin jetildirý úshin quqyqtyq jaǵdaılar jasaýǵa múmkindik beredi, Qazaqstan halqynyń densaýlyǵyn qamtamasyz etýdi jáne sapaly dárilik preparattardy emin-erkin alý múmkindigin keńeıtedi», - dedi depýtat.
