Senat keńistiktik derekter ınfraqurylymyn qurýdy kózdeıtin zań qabyldady

ASTANA. QazAqparat – Búgin Senat otyrysynda «Geodezııa, kartografııa jáne keńistiktik derekter týraly» QR Zańy qabyldandy, dep habarlaıdy QazAqparat tilshisi.

Sonymen qatar senatorlar «Qazaqstan Respýblıkasynyń keıbir zańnamalyq aktilerine geodezııa, kartografııa jáne keńistiktik derekter máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń zańyn da qabyldady.

«Qabyldanǵan zańdar elimizdegi geodezııa, kartografııa jáne keńistik derekterge qatysty zańnamany jetildirýdi kózdeıdi. Jańa normalar keńistiktik derekter, geodezııa jáne kartografııa salasyndaǵy qyzmettiń jetildirilgen tetikterin engizedi. Sondaı-aq ulttyq keńistiktik derekter ınfraqurylymyn qurý jáne qoldaný úshin quqyqtyq negiz qalyptastyrady. Bul ınfraqurylym tutynýshylardyń elektrondy derekterge qoljetimdiligin jáne olardy tıimdi paıdalanýdy qamtamasyz etedi. Aldaǵy ýaqytta tolyq jáne anyq keńistiktik derekter men geodezııa jáne kartografııa júıeleri aqparatty jedel óńdeýge, ekonomıkanyń salalarynda jáne memlekettik basqarý júıesinde utymdy sheshimder qabyldaýǵa oń áserin tıgizedi dep senemiz», - dedi Senat tóraǵasy Máýlen Áshimbaev.