Senat «Keleshek» erikti jınaqtaý júıesine qatysty zańdy maquldady
ASTANA. KAZINFORM – Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine Memlekettik bilim berý jınaqtaý júıesi, aqparat, qoǵamdyq damý, mádenıet jáne arhıv isi salalarynda artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» Zańy eki oqylymda qaralyp, maquldandy.
- Zańda tıisti novellalar eskerilgen. Birinshiden, Qazaqstan Prezıdentiniń «Memlekettik apparattyń qyzmetin bıýrokratııadan aryltý jónindegi sharalar týraly» Jarlyǵyn iske asyrý maqsatynda ázirlendi. Osy oraıda, aqparat ári qoǵamdyq damý, mádenıet, muraǵat isi salalarynda shamadan tys reglamentteýdi azaıtady. Sondaı-aq jumysty jedel uıymdastyrý maqsatynda osy salalarǵa qatysty zańdardaǵy memlekettik organnyń negizgi qyzmetine, ishki rásimderine, onyń basqa memlekettik organdarmen ózara is-qımylyna baılanysty erejelerdi zańǵa táýeldi normatıvtik-quqyqtyq aktilerdiń deńgeıine túsirý usynyldy, - dedi senator Aıgúl Qapbarova.
Ekinshiden, QR Úkimetiniń quzyretine kreatıvti ındýstrııany damytýǵa járdemdesetin zańdy tulǵany aıqyndaý boıynsha quzyret beriledi. Sáıkesinshe, mádenıet salasyndaǵy ýákiletti organ kreatıvti ındýstrııaǵa memlekettik qoldaý kórsetý jáne yntalandyrý qaǵıdalaryn ázirleý ári bekitý jónindegi ókilettikke ıe bolady. Kreatıvti ındýstrııalar salasyndaǵy memlekettik saıasatty iske asyrý oblystyń, respýblıkalyq mańyzy bar qalanyń jáne astananyń jergilikti atqarýshy organdarynyń quzyretine de engiziledi.
- Úshinshiden, Memleket basshysynyń 2023 jylǵy 1 qyrkúıektegi Qazaqstan halqyna Joldaýynda aıtylǵan tapsyrmasyn oryndaý maqsatynda «Keleshek» biryńǵaı erikti jınaqtaý júıesiniń qyzmetin reglamentteıtin túzetýlerdi engizý kózdelip otyr. Júıede Qazaqstanda, shetelde kásiptik-tehnıkalyq, joǵary, joǵary oqý ornynan keıingi bilimge aqy tóleý maqsatynda qarajatty jınaqtaýǵa bolady. Aǵymdaǵy kúntizbelik jyly 5 jasqa tolǵan balalar úshin salymdardy ekinshi deńgeıdegi bankterde jáne ómirdi saqtandyrý kompanııalarynda ashý múmkindigi beriledi. Munyń tartymdylyǵyn arttyrý retinde – salymshylarǵa memleketten jyl saıynǵy syılyqaqy berý, ınvestıtsııalyq kiris alý (bastapqy bilim berý kapıtalyn (60 AEK), jyl saıynǵy memlekettik syılyqaqy (5% jáne 7%), banktiń syıaqysyn nemese saqtandyrý uıymynyń ınvestıtsııalyq kirisi (orta eseppen 12%) alady), salymǵa kepildik berý, óndirip alýdan bosatylý jáne oqý ornyn tańdaý boıynsha shekteýlerdiń bolmaýy múmkindikteri qaralǵan, - dedi depýtat.
Bıyl qarasha aıynda Ǵylym jáne joǵary bilim vıtse-mınıstri Talǵat Eshenqulov «Keleshek» kapıtalyn tóleýge qatysty túsinik berdi.
Buǵan deıin «Keleshek» baǵdarlamasy qandaı múmkindik beretinin jazǵan edik.