Senat kedendik bajdardyń úzdiksiz aýdarylýyna arnalǵan zańdy maquldady
ASTANA. KAZINFORM – Búgin Senattyń jalpy otyrysynda «2014 jylǵy 29 mamyrdaǵy EAEO týraly shartqa EAEO-ǵa múshe memleketterdiń arasynda kedendik ákelim bajdarynyń somasyn aýdarýǵa qatysty bólikte ózgerister engizý týraly hattamany ratıfıkatsııalaý týraly» Zańy maquldandy.
- 2014 jylǵy 26 mamyrdaǵy Eýrazııalyq ekonomıkalyq odaq týraly sharttyń 26-babyna sáıkes, tólengen kedendik ákelý bajdary múshe memleketterdiń bıýdjetteri arasynda esepke alynýǵa jáne bólinýge jatady. Shartqa ózgerister engizý týraly hattamada ulttyq (ortalyq) bankter arasynda kedendik ákelý bajdaryn esepke alý ári bólý kezinde týyndaıtyn qarsy mindettemelerdi óteýdiń ýaqytsha balama tártibin engizý kózdelgen. Bul rette, keden bajdarynyń somalaryn odaqqa múshe ózge elderdiń bıýdjetterine bólý jáne esepke alý tetigi ózgergen joq. Hattama erejelerine sáıkes, Ulttyq bank zańnamada kózdelgen memleketishilik rásimderdi aıaqtaýy qajet. Osyǵan oraı, ratıfıkatsııalaýdy júzege asyrý, memleketishilik rásimderdiń durys aıaqtalýyn bildiredi. Joǵaryda kórsetilgendeı, atalǵan ádisti engizý ýaqytsha sanalady. Onyń maqsaty – Eýrazııalyq ekonomıkalyq odaqqa múshe memleketteriniń bıýdjettik kirisine kedendik bajdardy aýdarýdyń úzdiksiz júrýin qamtamasyz etý, - dedi senator Bekbolat Orynbekov.
Onyń aıtýynsha, qazirgi kezde EAEO-ǵa múshe memleketterdiń arasyndaǵy saýda aınalymynyń basym bóligi osy 5 eldiń ulttyq valıýtalarymen júrgiziledi.
- Usynylǵan hattama tek kedendik ákimshilendirýdi jáne memleket bıýdjetterin bólý mehanızmin aıqyndaıdy. Sondyqtan, bul normalar naryq pen saýdaǵa áser etpeıdi, - dedi depýtat.
Senattyń Qarjy jáne bıýdjet komıtetiniń qorytyndysyna qaraǵanda, zań sanktsııalyq shekteýler jaǵdaıynda Eýrazııalyq ekonomıkalyq odaq aıasynda kedendik bajdardy ákimshilendirýdi júzege asyrý kezindegi kedergilerdi joıýǵa baǵyttalǵan. Zańdy maquldaý Qazaqstannyń respýblıkalyq bıýdjetine kedendik bajdardyń úzdiksiz aýdarylýyn qamtamasyz etýge múmkindik beredi.
Eske salsaq, EAEO-ǵa múshe basqa memleketterdiń aýmaǵynda memlekettik satyp alýǵa qatysý jeńildetiledi.