Senat kedendik shekara arqyly ótetin taýarlardyń qunyn aıqyndaýǵa arnalǵan zańdy qabyldady

ASTANA. 23 mamyr. QazAqparat - Búgin Qazaqstan Respýblıkasy Parlamenti Senatynyń jalpy otyrysynda «Keden odaǵynyń kedendik shekarasy arqyly ótkiziletin taýarlardyń kedendik qunyn aıqyndaý týraly kelisimge ózgerister men tolyqtyrýlar engizý týraly hattamany ratıfıkatsııalaý týraly» zań qabyldandy.

Hattamanyń maqsaty Keden odaǵynyń zańnamasyn Dúnıejúzilik saýda uıymynyń kedendik baǵalaý jónindegi kelisiminiń erejelerine sáıkestendirý bolyp tabylady. Bul rette hattamanyń erejeleri aldyn ala deklaratsııalaý kezinde kedendik qunyn anyqtaýdy, taýarlardyń kedendik qunyn anyqtaý barysynda syrtqy saýda mámilelerine qatysýshylardyń ózara baılanysyn, taýardyń kedendik quny týraly naqty málimetter bolmaǵan kezde keıinge qaldyrylatyn sheshimder úderisterin qarastyrady.

Sondaı-aq otyrysta elimizdiń keıbir zańnamalyq aktilerine Keden odaǵynda tarıftik emes retteý sharalaryn qoldaný máseleleri boıynsha ózgerister men tolyqtyrýlar engizý týraly zań jobasy birinshi oqylymda qaraldy. Zań jobasy Qazaqstan Respýblıkasynyń zańnamalyq aktilerin Keden odaǵy men Biryńǵaı ekonomıkalyq keńistiktiń tarıftik emes retteý salasyndaǵy halyqaralyq kelisimderimen sáıkestendirý maqsatynda ázirlengen.