Senat Qazaqstannyń bitimgerlerine arnalǵan ótemaqyǵa qatysty zańdy maquldady

ASTANA. KAZINFORM – Búgin Senattyń jalpy otyrysynda Birikken Ulttar Uıymy aıasyndaǵy bitimgerlik mıssııaǵa qatysty eki qujat qaraldy.

Сенат Парламента Парламент Сенаты
Фото: Ағыбай Аяпбергенов /Kazinform

Atap aıtqanda, senatorlar «BUU-nyń bólýdi baqylaý jónindegi kúshterine (UNDOF) resýrs usynatyn Qazaqstan Úkimeti men BUU arasyndaǵy ózara túsinistik týraly memorandýmdy ratıfıkatsııalaý týraly» Zańyn maquldady.

Bul memorandýmǵa 2024 jylǵy 14 aqpanda qol qoıyldy. Ol Qazaqstan Respýblıkasynyń bitimgershilik qyzmetiniń quqyqtyq ári uıymdastyrý negizderin belgileıdi, personaldy, tehnıka men materıaldyq qamtamasyz etýdi berý tártibin, sondaı-aq qarjylandyrý jáne shyǵyndardy óteý tetigin aıqyndaıdy.

Senattyń Halyqaralyq qatynastar, qorǵanys jáne qaýipsizdik komıtetiniń málimetine qaraǵanda, qujat UNDOF quramyndaǵy qazaqstandyq áskerı qyzmetshilerdiń mártebesin, olardyń tártiptik jáne qylmystyq jaýapkershiligin, sondaı-aq mindettemelerdiń oryndalýyn baqylaý sharalaryn bekitedi. Memorandým aıasynda BUU jeke quramǵa tólemderdi qosa alǵanda, Qazaqstan Respýblıkasynyń mıssııaǵa qatysýyna baılanysty shyǵystardy óteýge mindetteme alady.Zańnyń qabyldanýy beıbitshilik pen qaýipsizdikti qoldaý salasyndaǵy jaýapty áriptes retinde Qazaqstan Respýblıkasynyń halyqaralyq ımıdjin nyǵaıtady, qorǵanys salasyndaǵy yntymaqtastyqty keńeıtedi jáne sheteldik bitimgershilik kontıngenttermen tájirıbe almasý úshin jaǵdaı jasaıdy.

Senator Andreı Lýkınniń aıtýynsha, memorandýmda eskerilgen qarjylyq mindettemeler qazaqstandyq kontıngenttiń qatysqany úshin BUU tarapynan ótemaqy tólemderin qamtyp otyr.

BUU tólemderiniń jalpy somasy jylyna shamamen 5 mln AQSh dollaryn quraıdy:

- jeke quram úshin jylyna shamamen 2,4 mln AQSh dollary (árbir áskerı qyzmetshige aıyna 1 448 AQSh dollary).

- tehnıkany, qarýdy jáne múlikti paıdalanǵany úshin jylyna 2,6 mln AQSh dollary.

- Bul Qazaqstanǵa bitimgershilik mıssııalarǵa qatysý kezinde bıýdjettik shyǵyndardy barynsha azaıtýǵa múmkindik beredi, - dedi depýtat.

Sonymen qatar, Senattyń jalpy otyrysynda «2024 jylǵy 14 aqpandaǵy Birikken Ulttar Uıymynyń bólýdi baqylaý jónindegi kúshterine (UNDOF) resýrs usynatyn Qazaqstan Úkimeti men BUU arasyndaǵy ózara túsinistik týraly memorandýmǵa hattar almasý nysanyndaǵy kelisimdi ratıfıkatsııalaý týraly» Zańy maquldandy.

Kelisim qazaqstandyq bitimgershilik kontıngenttiń UNDOF mıssııasyna qatysýy úshin personaldy, negizgi jabdyqty jáne ózin-ózi qamtamasyz etý quraldaryn bergeni úshin BUU-nyń Qazaqstan Respýblıkasynyń Úkimetine tólem jasaý tártibin retteıdi.

Zańdy ratıfıkatsııalaý qarjylyq esepteýlerdiń ashyqtyǵyn jáne qarajat túsiminiń boljamdylyǵyn qamtamasyz ete otyryp, BUU-nyń Qazaqstan Respýblıkasyna tıisti shyǵyndardy óteý jónindegi mindettemelerin bekitedi.

Eske salsaq, byltyr jeltoqsan aıynda QR Qorǵanys mınıstrligi Golan jotalaryndaǵy bitimgerlerdiń qaýipsizdigi úshin qajet shara qabyldap jatqanyn habarlady. 

Jaqynda QR Qorǵanys mınıstriniń tárbıe jáne ıdeologııalyq jumystar jónindegi orynbasary Shaıh-Hasan Jazyqbaev qazaqstandyq bitimgerlerge qaı somada ótemaqy qarastyrylǵanyn aıtty.

Budan bólek, Golan jotalarynan oralǵan qazaqstandyq bitimgerler qyzmetin qaıda jalǵastyratyny málim boldy.

Buǵan deıin habarlanǵandaı, BUU Qazaqstanǵa bitimgerlik mıssııaǵa jylyna 5 mln dollar tólem jasaıdy.

Сейчас читают