Senat Qazaqstannan sheteldikterdi shyǵarý tetikteri jónindegi zańyn qabyldady
NUR-SULTAN. QazAqparat – Senattyń jalpy otyrysynda «Qazaqstan Respýblıkasynyń keıbir zańnamalyq aktilerine adamdardy Qazaqstannyń sheginen tys jerge shyǵaryp jiberý kezinde ustaý merzimderin retteý máseleleri boıynsha ózgerister men tolyqtyrýlar engizý týraly» Zańy eki oqylymda qaralyp, qabyldandy, dep habarlaıdy QazAqparat tilshisi.
Zań jobasy QR Parlamentiniń depýtattary men azamattardyń, sondaı-aq sheteldikterdiń jáne azamattyǵy joq adamdardyń bostandyqqa jáne jeke basyna qol suǵylmaýshylyq quqyqtaryn qorǵaý salasyndaǵy ulttyq zańnamany odan ári jetildirý maqsatynda ázirlengen.
Zań jobasy Qazaqstan Respýblıkasynyń Qylmystyq-protsestik jáne Qylmystyq-atqarý kodeksterine, sondaı-aq «Sheteldikterdiń quqyqtyq jaǵdaıy týraly», «Quqyq buzýshylyq profılaktıkasy týraly», «Adamdardy qoǵamnan ýaqytsha oqshaýlaýdy qamtamasyz etetin arnaýly mekemelerde ustaý tártibi men sharttary týraly» jáne «Halyqtyń kóshi-qony týraly» Qazaqstan Respýblıkasynyń zańdaryna túzetýler engiziledi.
Zań jobasynyń negizgi mindeti joǵaryda atalǵan zańnamalyq aktilerge naqty túzetýler engizý bolyp otyr:
- qylmystyq-protsestik kodekste shyǵaryp jiberý retindegi jazalaý túri naqtylanady, sondaı-aq qylmystyq-atqarý kodeksinde sheteldikter men azamattyǵy joq adamdardy qylmystyq ister boıynsha elden tysqary májbúrlep shyǵaryp jiberý úshin júrip-turý erkindigin aldyn ala shekteýdi qoldanýdyń naqty quqyqtyq negizderi men tetikteri beriledi;
- «Sheteldikterdiń quqyqtyq jaǵdaıy týraly» QR Zańyna qylmystyq, ákimshilik ister jáne erekshe júrgiziletin ister boıynsha sot aktilerin májbúrlep oryndaý úshin shyǵaryp jiberýden jaltaratyn adamdardy ustaýdyń (sottyń sanktsııasymen 30 táýlikke deıingi merzimge) quqyqtyq tetikteri men merzimderin jetildirýdi kózdeıtin túzetý engiziledi;
- «Quqyq buzýshylyq profılaktıkasy týraly» QR Zańy jańa normamen tolyqtyrylady, oǵan sáıkes májbúrlep shyǵaryp jiberýge jatatyn jáne odan jaltaratyn sheteldikter men azamattyǵy joq adamdarǵa qatysty qamtamasyz etý sharasy retinde sottyń sanktsııasymen júrip-turý erkindigin aldyn ala shekteý qoldanylady;
- «Adamdardy qoǵamnan ýaqytsha oqshaýlaýdy qamtamasyz etetin arnaýly mekemelerde ustaý tártibi men sharttary týraly» QR Zańynda júrip-turý erkindigin aldyn ala shekteý uǵymy beriledi, sondaı-aq shyǵaryp jiberiletin adamdardy merzimi otyz táýlikke deıin arnaýly qabyldaý oryndaryna ornalastyrý úshin quqyqtyq negizdeme kózdelgen. Mundaı shekti merzim «Halyqtyń kóshi-qony týraly» Qazaqstan Respýblıkasynyń Zańynda da belgilengen.
Tutastaı alǵanda zań jobasyn qabyldaý adamnyń quqyqtary men bostandyqtarynyń, qoǵam men memleket múddeleriniń qoǵamdyq qaýipti qolsuǵýshylyqtardan qorǵalýynyń sapalyq jańa deńgeıin qamtamasyz etýge múmkindik beredi jáne teris áleýmettik-ekonomıkalyq jáne quqyqtyq saldarlarǵa alyp kelmeıdi.
