Senat Qazaqstan men Reseıdiń Kaspıı teńiziniń soltústigindegi ken ornyn birlese zertteý týraly kelisimin qaraıdy
ASTANA. QazAqparat - Búgin Parlament Senaty Halyqaralyq qatynastar, qorǵanys jáne qaýipsizdik komıtetiniń keńeıtilgen otyrysy bolyp ótti. Onda «1998 jylǵy 6 shildedegi Qazaqstan Respýblıkasy men Reseı Federatsııasy arasyndaǵy Jer qoınaýyn paıdalanýǵa arnalǵan egemendik quqyqtardy júzege asyrý maqsatynda Kaspıı teńiziniń soltústik bóliginiń túbin mejeleý týraly hattamaǵa ózgerister engizý týraly hattamany ratıfıkatsııalaý týraly» zań jobasy talqylandy.
Atalǵan kelisim Qazaqstan men Reseıdiń, olardyń ýákilettik tulǵalary arasyndaǵy «Qurmanǵazy» (Qazaqstan) ken ornyn, «Tsentralnyı» jáne «Hvalynskoe» (Reseı) ken qurylymdaryn, Kaspıı teńiziniń soltústik bóliginiń túbin birlesip ıgerý boıynsha qyzmettiń quqyqtyq negizderin bekitedi. Energetıka vıtse-mınıstri Áset Maǵaýovtyń aıtýynsha, 2015 jyly eki el basshylary Tsentralnyı geologııalyq qurylymyn jete barlaý quqyǵyn bólý jónindegi ózgeristerdi qamtyǵan hattamaǵa qol qoıǵan bolatyn. Tsentralnyıdyń qurylymy Kaspıı teńiziniń soltústik bóliginde, Aqtaý qalasynyń ońtústik batysyna qaraı 150 shaqyrym, Astrahan qalasynan 440 shaqyrym qashyqtyqta Reseı sektorynda ornalasqan. Jumys ýchaskesindegi sý tereńdigi 350-500 metrdi quraıdy. Reseı tarapynyń aldyn ala derekteri boıynsha qurylymda 90 mln. tonna munaı, sonyń ishinde S-1 sanaty boıynsha - 6 mln tonna, S-2 sanaty boıynsha 84 mln tonna munaıdy quraıdy.
«Kelisimdegi ózgerister Reseıdiń Jer qoınaýyn paıdalaný jónindegi federaldyq agenttiginiń birlesken kásiporynyna «Neftegazovaıa Kompanııa Tsentralnaıa» JShQ jete barlaý júrgizýge lıtsenzııa alýǵa ýájdemelik bas tartýǵa qatysty bolyp otyr. Reseı zańnamasyna sáıkes, jete barlaý bóliginde shekteýler belgilengen. Atap aıtqanda, geologııalyq zertteýlerge qatysty jalpy merzimi men barlady uzartý múmkindigin qarastyrmaıdy jáne bes jyl merzimge beriledi. Osyǵan baılanysty hattamaǵa ózgerister engizilip otyr. Tutastaı alǵanda, Tsentralnyı qurylymyn ıgerý Kaspıı teńiziniń soltústik bóligin ıgerý kezindegi geologııalyq aqparattar alýǵa, qazaqstandyq kadrlar úshin jańa jumys oryndaryn qurýǵa múmkindik beredi», - dedi Á. Maǵaýov.
Zań jobasy aldaǵy ýaqytta ótetin palatanyń jalpy otyrysyna shyǵarylatyn bolady.
