Senat Qazaqstan men Ózbekstannyń yntymaqtastyǵyn keńeıtýge baǵyttalǵan zańdy maquldady
ASTANA. KAZINFORM — Búgin Senattyń jalpy otyrysynda «Qazaqstan Respýblıkasy men Ózbekstan Respýblıkasy arasyndaǵy odaqtastyq qatynastar týraly shartty ratıfıkatsııalaý týraly» QR Zańy maquldandy.
Sharttyń maqsaty — ekijaqty ózara is-qımyldyń barlyq áleýetin júzege asyrý.
«Shartty jasasý joǵary deńgeıdegi ýaǵdalastyqqa jáne 2021 jylǵy 6 jeltoqsandaǵy elderimiz arasyndaǵy odaqtastyq qatynastar týraly Deklaratsııanyń 17 pýnktine sáıkes, Qazaqstan Prezıdentiniń 2022 jylǵy 22 jeltoqsanda Ózbekstanǵa jasaǵan memlekettik sapary aıasynda júzege asyryldy. Shartta saıası, áskerı, saýda-ekonomıkalyq, tranzıttik-kóliktik, energetıkalyq, mádenı-gýmanıtarlyq, azamattyq qorǵanys jáne energetıka salalarynda yntymaqtastyqty keńeıtý eskerilgen. Transshekaralyq sý resýrstaryn utymdy paıdalaný jáne qorǵaý, sondaı-aq ekologııalyq jáne azyq-túlik qaýipsizdigi máseleleri de nazardan tys qalmaǵan. Halyqaralyq arenada ózara is-qımyldy nyǵaıtý qarastyrylǵan», — dedi Senat depýtaty Alısher Satvaldıev.
Sonymen qatar, bul qujatty qabyldaý arqyly eki memlekettiń parlamentteri, saıası partııalary men qoǵamdyq uıymdary arasyndaǵy baılanystardy nyǵaıtý qarastyrylǵan. Shart aıasynda memleket basshylary jetekshilik etetin Joǵary Memleketaralyq keńes qurylady, jáne onyń qyzmetin úılestirý Syrtqy ister mınıstrleriniń keńesine júkteledi.
«Ótken jyldyń sońynda Ózbekstan Prezıdenti shartty ratıfıkatsııalaý týraly Jarlyqty rásimdedi. Ózbek jaǵy Sharttyń ratıfıkatsııalanǵanyn 2023 jyly 1 jeltoqsanda notalyq tártippen habarlady. Ózbekstanmen ǵasyrlar boıy dostyq, rýhanı tamyrlar, tarıhtyń ortaqtyǵy men ózara qoldaý kórsetýmen baılanysyp kelemiz. Ózbekstan — Qazaqstan úshin senimdi odaqtas, ári mańyzdy seriktes memleket. Eki el baılanysy teńdikke, ózara qurmet pen senimge negizdelgen tolyq formatty ekijaqty ózara is-qımyldy qalyptastyrdy. Memleketaralyq jáne parlamentaralyq baılanystardyń barlyq spektri boıynsha turaqty jáne tyǵyz dıalog ornatyldy. Bul Shart halyqtarymyzdyń túbegeıli múddelerine saı keledi dep esepteýge bolady», — dedi senator.
