Senat Qazaqstan men Ózbekstannyń ekologııalyq bastamalaryna arnalǵan qujatty maquldady
ASTANA. KAZINFORM – Búgin Senattyń jalpy otyrysynda «Qazaqstan Úkimeti men Ózbekstan Úkimeti arasyndaǵy ekologııa jáne qorshaǵan ortany qorǵaý salasyndaǵy yntymaqtastyq týraly kelisimdi ratıfıkatsııalaý týraly» Zańy maquldandy.
Bul kelisimge 2022 jylǵy 22 jeltoqsanda Tashkentte qol qoıylǵan. Kelisim qorshaǵan ortany qorǵaý salasyndaǵy yntymaqtastyqty damytýǵa jáne tıisinshe Qazaqstan Respýblıkasy men Ózbekstan Respýblıkasy arasyndaǵy ekologııa jáne qorshaǵan ortany qorǵaý salasyndaǵy dostyq qarym-qatynastardy nyǵaıtýǵa baǵyttalǵan.
Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń málimetinshe, atalǵan qujat aıasynda atmosferalyq aýanyń lastanýynyń aldyn alý jáne ony baqylaý, sýdyń lastanýyna jol bermeý, bıologııalyq ártúrlilikti saqtaý, ekojúıeni tozýdan qorǵaý jáne qumdy daýyldardyń aldyn alý jáne basqa da máseleler eskerilgen.
Budan basqa, Kelisimde Aral basseınindegi ekologııalyq jaǵdaıdy jaqsartý jónindegi birlesken is-sharalardy ázirleý qarastyrylǵan. Osy halyqaralyq qujat sheńberinde qorshaǵan ortany monıtorıngteý salasyndaǵy birlesken ǵylymı-zertteý qyzmeti máseleleri boıynsha birlesken konferentsııalar, dóńgelek ústelder, kezdesýler, sondaı-aq jumys toptaryn ótkizý josparlanǵan.
«Atalǵan Kelisim qorshaǵan ortany qorǵaý salasyndaǵy yntymaqtastyqty jáne orman alqaptaryn qalpyna keltirýdi uıymdastyrýdy, sondaı-aq topyraq pen ósimdik jamylǵysynyń degradatsııasyna qarsy kúresti qosa alǵanda, monıtorıngileý boıynsha ózara is-qımyldy jaqsartýǵa múmkindik beredi. Qujat sý synamalaryn birlesip irikteýdi, sý sapasy boıynsha derekterdi jáne normatıvtik qujattardy taldaýdy ári almasýdy júzege asyrýǵa baǵyttalǵan. Aral basseınindegi ekologııalyq jaǵdaıdy jaqsartý boıynsha ózbek tarapymen birlesken is-sharalardy júrgizý mańyzdy is-shara dep oılaımyn. Osyǵan baılanysty bul Kelisimniń qabyldanýy eki memlekettiń Aral teńizi men Aral óńirin qalpyna keltirýdegi, sondaı-aq osy saladaǵy halyqaralyq ári óńirlik baǵdarlamalardy ázirleý men júzege asyrýdaǵy kúsh-jigerin biriktiredi jáne úılestiretin bolady. Sekseýil egý arqyly Aral teńiziniń ekologııalyq daǵdarysynyń saldaryn jeńildetý jáne qum-tuzdy daýyldardyń aldyn alý boıynsha Qazaqstan men Ózbekstan taraptarynyń is-qımyldaryn úılestirýge múmkindik beredi», - dedi senator Janbolat Jórgenbaev.
