Senat Qazaqstan men Lıtva arasyndaǵy zańsyz kóshi-qonmen kúresti kúsheıtetin kelisimdi qabyldady
ASTANA. QazAqparat - Búgin Parlament Senatynyń jalpy otyrysynda «Qazaqstan Respýblıkasynyń Úkimeti men Lıtva Respýblıkasynyń Úkimeti arasyndaǵy Adamdardyń readmıssııasy týraly kelisimdi ratıfıkatsııalaý týraly» QR Zańy qabyldandy.
Atalǵan kelisimge 2011 jyly 6 qazanda Astanada qol qoıylǵan.
Qujattyń kúshine enýi arqyly Qazaqstan men Lıtva arasyndaǵy jalpy azamattyq, ulttyq pasport ıeleri úshin Vızasyz rejım ornatýǵa negizgi shart bolmaq. Bul rette qujat eki memlekettiń aýmaǵyna kirý jáne onda bolý sharttaryn buzǵan adamdardy anyqtap, olardy elderine qaıtarýdy kózdeıdi. Atalǵan sanatqa elimizdiń aýmaǵyna zańsyz kirgen nemese zańdy kirgen, biraq Vıza nemese ruqsatynyń ýaqyty ótip ketkennen keıin elimizde qalyp qoıǵan adamdar jatady.
Bul rette Astana jáne Almaty qalalarynyń halyqaralyq áýejaılary readmıssııa úshin Qazaqstannyń shekarasyn kesip ótý pýnkti bolyp bekitiledi. Al Qazaqstan men Lıtva Respýblıkasynyń Іshki ister mınıstrlikteri osy kelisimdi iske asyratyn quziretti organdar bolyp tabylady.
Tutastaı alǵanda, qujatty ratıfıkatsııalaý zańsyz kóshi-qonmen kúresýge múmkindik beredi. Memleketterdiń aýmaǵynda zańsyz júrgen azamattardy halyqaralyq quqyqqa sáıkes qabyldaýdy jáne olardyń tranzıtin jeńildetedi. Parlament qabyldaǵan qujat Memleket basshysynyń qol qoıýyna joldanady.
