Senat Qazaqstan men Qytaı arasynda avıatsııa salasyndaǵy qujatty maquldady
Zań eki eldiń azamattyq avıatsııa salasyndaǵy yntymaqtastyǵyn odan ári nyǵaıtýǵa arnalǵan. Osy qujat arqyly azamattyq áýe kemelerin avıatsııalyq izdeý jáne qutqarý máseleleri retteledi. Kelisimdi ratıfıkatsııalaý eki eldiń azamattyq ushaqtardy izdeý jáne qutqarý kezindegi birlesken is-qımyldarynyń tıimdiligin arttyrýǵa múmkindik beredi.
«Bul kelisimge 2019 jylǵy 11 qyrkúıekte Beıjiń qalasynda qol qoıylǵan bolatyn. Kelisim boıynsha izdeý-qutqarý operatsııalaryn uıymdastyrý jáne oryndaýda ózara is-qımyldyń naqty algorıtmin kózdeıdi. Ár tarap óz aýdanynda azamattyq áýe kemelerin izdeý jáne qutqarý qyzmetteriniń jaýapkershiligin, olardyń táýlik boıy kezekshiligin qamtamasyz etedi. Kelisim avıatsııalyq oqıǵa týraly ózara habarlaý jáne ekinshi taraptan kómek suraý týraly mindetin kózdeıdi. Taraptar ózderiniń jaýapkershilik aımaǵynda izdestirý-qutqarý operatsııalaryn júzege asyrý kezinde bolǵan shyǵystardy ózderi kóteretin bolady. Qujat aıasynda eki memlekettiń quzyretti organdary men izdeý, qutqarý qyzmetteri arasyndaǵy yntymaqtastyqty nyǵaıtý kózdelgen», - dedi senator Súıindik Aldashev.
Mundaı yntymaqtastyqqa izdeý jáne qutqarý boıynsha birlesken oqý-jattyǵýlar, memleketaralyq baılanys arnalaryn júıeli túrde tekserý, izdestirý ári qutqarý jónindegi sarapshylardyń ózara saparlary, izdestirý-qutqarý aqparaty men tájirıbe almasý kiredi.
«1992 jyly Qazaqstan Respýblıkasy ratıfıkatsııalaǵan Halyqaralyq Azamattyq avıatsııa týraly konventsııa aıasynda kórshiles eki memleket arasynda avıatsııalyq izdeý jáne qutqarý salasyndaǵy is-qımyldardy úılestirý úshin kelisim jasaý eskerilgen. Osy Konventsııany ustana otyryp, Qazaqstan kórshi eldermen belgilengen baǵyttaǵy yntymaqtastyqty qalyptastyryp keledi. Aıtar bolsaq, 2017 jyly Qazaqstan Respýblıkasy men Reseı Federatsııasynyń Úkimetteri arasyndaǵy avıatsııalyq izdeý jáne qutqarý salasyndaǵy yntymaqtastyq týraly kelisim ratıfıkatsııalandy. Byltyr Qyrǵyz Respýblıkasymen arada osyndaı kelisimge qol qoıyldy», - dedi Súıindik Aldashev.
