Senat Qazaqstan men Qyrǵyzstannyń ınvestıtsııalardy qorǵaý týraly kelisimin maquldady
ASTANA. KAZINFORM – Búgin Senattyń jalpy otyrysynda Qazaqstan Úkimeti men Qyrǵyz Mınıstrler Kabıneti arasyndaǵy ınvestıtsııalardy kótermeleý jáne ózara qorǵaý týraly kelisimdi ratıfıkatsııalaý týraly zańy maquldandy.
Bul kelisimge 2024 jylǵy 19 sáýirde Qyrǵyz Respýblıkasy Prezıdentiniń Astanaǵa resmı sapary barysynda qol qoıylǵan. Onyń jańa nusqasyn qyrǵyz tarapy atqarýshy bılik qurylymyndaǵy ózgeristerge baılanysty 2021 jyly qaıta usynǵan bolatyn.
— 1997 jyly jasalǵan burynǵy kelisim shamamen 30 jyldan keıin halyqaralyq jáne ulttyq zańnamadaǵy ózgeristerdi eskere otyryp, jańartýdy qajet etti. Investıtsııalardy kótermeleý jáne qorǵaý týraly kelisimder ınvestıtsııalardyń senimdiliginiń mańyzdy kórsetkishi bolyp tabylady, - dedi senator Gennadıı Shıpovskıh.
Jalpy, Qazaqstan men Qyrǵyzstan arasyndaǵy saýda-ekonomıkalyq jáne ınvestıtsııa salalaryndaǵy ekijaqty yntymaqtastyq ósip keledi. Búginde Qazaqstan Qyrǵyzstannyń úshinshi iri saýda seriktesi.
– Qazaqstan men Qyrǵyzstan arasyndaǵy taýar aınalymy 2024 jyly 1,71 mlrd AQSh dollaryna jetti. Qazaqstannan eksport 9,6%-ǵa ósip, 1,3 mlrd AQSh dollaryn qurady. Bul bizdiń ekonomıkalyq qarym-qatynasymyzdyń turaqtylyǵyn kórsetedi. Qyrǵyzstanmen strategııalyq áriptestik Ortalyq Azııadaǵy óńirlik ıntegratsııany odan ári damytý perspektıvalaryn ashady, bul bizdiń halyqtarymyz arasyndaǵy baılanystyń nyǵaıýyna yqpal etedi, - dedi Senator.
Onyń aıtýynsha, kelisimdi iske asyrý teris áleýmettik-ekonomıkalyq saldarǵa ákep soqpaıdy jáne respýblıkalyq bıýdjetten qosymsha shyǵystardy talap etpeıdi.
– Atalǵan zań jumys tobynyń jáne komıtettiń otyrystarynda jan-jaqty qaraldy. Senattyń turaqty komıtetterinen eskertýler men usynystar túsken joq. Joǵaryda aıtylǵandy eskere kele, Halyqaralyq qatynastar, qorǵanys jáne qaýipsizdik komıteti «Qazaqstan Respýblıkasynyń Úkimeti men Qyrǵyz Respýblıkasynyń Mınıstrler kabıneti arasyndaǵy Investıtsııalardy kótermeleý jáne ózara qorǵaý týraly kelisimdi ratıfıkatsııalaý týraly» Qazaqstan Respýblıkasynyń Zańyn maquldaýdy usynady, - dedi Gennadıı Shıpovskıh.
Aıta keteıik, buǵan deıin Qazaqstan men Qyrǵyzstan arasyndaǵy ınvestıtsııa qanshalyqty óskenin jazǵan edik.