Senat Qazaqstan men Kıpr arasyndaǵy quqyqtyq kómekke qatysty eki zańdy maquldady
Búgin Senattyń jalpy otyrysynda «Qazaqstan Respýblıkasy men Kıpr Respýblıkasy arasyndaǵy ustap berý týraly shartty ratıfıkatsııalaý týraly» Zań maquldandy, dep habarlaıdy Kazinform.
Zańnyń maqsaty - ýaǵdalasýshy memleketterdiń qylmysqa qarsy kúreste tıimdi yntymaqtastyǵyn qamtamasyz etý, qylmystyq quqyq buzýǵa qatysty rásimderde ózara quqyqtyq kómek kórsetý. Bul turǵydaǵy mindet - 2022 jylǵy 20 qazanda Nıkosııada jasalǵan Qazaqstan Respýblıkasy men Kıpr Respýblıkasy arasyndaǵy ustap berý týraly shartty ratıfıkatsııalaý.
Shart izdestirilip jatqan adamdardy qylmystyq jaýaptylyqqa tartý úshin olardy eki memleket arasynda ekstradıtsııalaý máselelerin reglamentteıdi. Adamdardy ustap berý, ustap berýdi keıinge qaldyrý nemese ýaqytsha ustap berý sharttary men rásimi aıqyndalǵan. Ustap berýden bas tartý úshin mindetti jáne fakýltatıvtik negizder belgilengen, ustap berý týraly suraý salý jáne qajetti qujattar kózdelgen.
Sonymen qatar, qujatta ustap berýden bas tartý úshin mindetti jáne fakýltatıvtik negizder belgilengen.
Shartty ratıfıkatsııalaý eki eldiń qylmysqa qarsy is-qımyl máseleleri boıynsha quqyqtyq yntymaqtastyǵynyń tıimdiligin arttyrady jáne ekijaqty qatynastardy nyǵaıtýǵa yqpal etedi. Budan basqa, qujatty ratıfıkatsııalaǵan jaǵdaıda ony iske asyrý teris áleýmettik-ekonomıkalyq jáne quqyqtyq saldarǵa alyp kelmeıdi, sondaı-aq qosymsha qarjylyq shyǵyndardy talap etpeıdi.
Munymen qosa, Senattyń jalpy otyroysynda «Qazaqstan Respýblıkasy men Kıpr Respýblıkasy arasyndaǵy qylmystyq ister boıynsha quqyqtyq kómek týraly shartty ratıfıkatsııalaý týraly» Zańy maquldandy.
Sharttyń negizgi maqsaty – Qazaqstan Respýblıkasy men Kıpr Respýblıkasy quzyretti organdary arasynda qylmystyq ister boıynsha quqyqtyq kómek alý jáne kórsetý máseleleri boıynsha qarym-qatynasty retteý.
Quqyqtyq kómek aıasynda Shart mynadaı protsestik áreketterdi:
- qujattardy, shaqyrý qaǵazdaryn jáne zattardy berý men tabys etýdi;
- adamnyń jeke basyn anyqtaýdy, onyń jáne zattardyń turǵan jerin aıqyndaýdy;
- beıne baılanys boıynsha aıǵaqtardy qosa alǵanda, aıǵaqtar men aryzdar alýdy;
- tintýdi, tyıym salýdy jáne tárkileýdi júzege asyrýdy;
- qujattarǵa nemese zattarǵa saraptama júrgizýdi;
- aqparat jáne dáleldemeler almasýdy qamtıdy.
Sondaı-aq, osy Shartta kózdelgen quqyqtyq kómektiń belgili bir túrleri saqtalmaǵan jaǵdaılarda, memlekettiń egemendigine, qaýipsizdigine qater tóndirse, onyń ulttyq zańnamasyna nemese halyqaralyq mindettemelerine qaıshy kelse - quqyqtyq kómek kórsetýden bas tartý eskerilgen.
