Senat Qazaqstan men Qasıetti Taq arasyndaǵy ózara qatynasty retteıtin zańdy maquldady

ASTANA. QazAqparat – Búgin Senattyń jalpy otyrysynda «1998 jylǵy 24 qyrkúıektegi Qazaqstan Respýblıkasy men Qasıetti Taq arasyndaǵy ózara qatynastar týraly kelisimge Qosymsha kelisimdi ratıfıkatsııalaý týraly» Zań maquldandy, dep habarlaıdy QazAqparat tilshisi.

Senator Qaırat Tastekeevtiń atap ótýinshe, atalǵan kelisimge Rım Papasy Frantsısktiń Qazaqstanǵa byltyrǵy issapary barysynda qol qoıyldy. Atalǵan shart Katolık Shirkeýi qyzmetshileriniń sanatyn, tıisti sýbektilerdi jáne quzyretti organdardy naqtylaıdy. Turaqty turý tártibi jeńildenedi.

«Atap aıtqanda, bank shotynda aqsha bolýy jáne turatyn jerin rastaý týraly talaptar alynyp tastaldy. Olardyń ornyna Katolık Shirkeýiniń jazbasha rastaýy jetkilikti bolady. Naqty aıtqanda, sheteldik din qyzmetshileri Qazaqstanǵa mıssıonerlik vıza boıynsha 6 aı merzimge kele alady jáne ony uzartý quqyǵy shekteýsiz beriledi. Búgingi kúni elimizde Katolık shirkeýiniń 232 sheteldik mıssıoneri turyp jatyr», - dedi senator.

Onyń sózine qaraǵanda, atalǵan usynystar konfessııaaralyq kelisimdi nyǵaıtýǵa, halyqaralyq deńgeıde elimizdiń quqyqtyq memleket retinde abyroıyn arttyrýǵa septigin tıgizedi.

Osydan keıin depýtattar zań jobasyn maquldady.

«Byltyr elimizde Álemdik jáne dástúrli dinder lıderleriniń VII sezi ótkeni belgili. Sezge qatysý úshin Qazaqstanǵa álemdik deńgeıdegi din kóshbasshylary keldi. Búgin maquldanǵan qosymsha kelisim Rım Papasy Franstsısktiń sol kezdegi resmı sapary aıasynda jasalǵan bolatyn. Aldaǵy ýaqytta osy qujat Qazaqstan men Qasıetti Taq arasyndaǵy yntymaqtastyqty odan ári nyǵaıtýǵa óz septigin tıgizedi dep senemiz», – dedi Senat tóraǵasy Máýlen Áshimbaev.