Senat Qazaqstan men Belarýs arasynda qos azamattyqqa jol bermeıtin kelisimdi ratıfıkatsııalady
NUR-SULTAN. QazAqparat - QR Parlamenti Senaty «Qazaqstan Respýblıkasynyń Úkimeti men Belarýs Respýblıkasynyń Úkimeti arasyndaǵy kóshi-qon salasyndaǵy yntymaqtastyq týraly kelisimdi ratıfıkatsııalaý týraly» Qazaqstan Respýblıkasy Zańyn qabyldady, dep habarlaıdy QazAqparat tilshisi.
«Sizderdiń nazarlaryńyzǵa «Qazaqstan men Belarýs Úkimetiniń kóshi-qon boıynsha yntymaqtastyq týraly kelisimdi ratıfıkatsııalaý týraly» zań jobasy usynylady. Kelisimge 2019 jyly 25 qazanda Nur-Sultan qalasynda qol qoıyldy. Bul qujat – azamattyq týraly aqparat almasýǵa, zańsyz kóshi-qonmen kúresýge múmkindik beredi. Naqty aıtsaq, birinshiden,
statıstıka men aqparat almasýǵa múmkindik beredi. Ekinshiden, azamattar týraly jeke aqparat alýǵa bolady. Úshinshiden, eki el Úkimetteri tájirıbe almasyp, bir-birine praktıkalyq kómek kórsetedi. Tórtinshiden, Qazaqstan men Belarýs zamattarynyń quqyqtyq mártebesi anyqtalady. Besinshiden, kóshi-qon salasyndaǵy qylmystarmen kúresip, zańsyz kanaldardy joıýǵa bolady», - dedi zań jobasy boıynsha baıandama jasaǵan QR Іshki ister mınıstri Erlan Turǵymbaev
Onyń atap ótýinshe, Belarýs Parlamenti kelisimdi 2020 jylǵy 18 mamyrda rásimdegen.
«Búgingi tańda Іshki ister mınıstrligi kóshi-qon boıynsha 23 halyqaralyq kelisimdi bekitti. Halyqaralyq deńgeıde taǵy 9 kelisim daıyndalýda. Osy kelisimderdiń nátıjesinde aqparat almasý jaqsarady; adamdardy basqa elderge qaıtarý máselesi sheshiledi; sheteldikterdiń Qazaqstanda bolý merzimi anyqtalady. Qos azamattyqqa jol berilmeıdi. Osy zań – azamattyq týraly aqparat almasýǵa, zańsyz kóshi-qondy retteýge, qos azamattyqpen kúresýge baǵyttalǵan. Áleýmettik-ekonomıkalyq, jáne quqyqtyq teris saldarǵa ákep soqpaıdy, jáne qosymsha qarajat talap etpeıdi»,- dedi Erlan Turǵymbaev.
