Senat Qazaqstan men BAÁ arasyndaǵy ınvestıtsııa jónindegi qujatty qabyldady

ASTANA. QazAqparat – Búgin Senattyń jalpy otyrysynda «Qazaqstan Respýblıkasynyń Úkimeti men Birikken Arab Ámirlikteriniń Úkimeti arasyndaǵy Investıtsııalardy kótermeleý jáne ózara qorǵaý týraly kelisimdi ratıfıkatsııalaý týraly» Zań qabyldandy, dep habarlaıdy QazAqparat tilshisi.

QR Syrtqy ister mınıstriniń birinshi orynbasary Qaırat Omarovtyń aıtýynsha, Qazaqstan Respýblıkasy men Birikken Arab Ámirlikteri arasyndaǵy yntymaqtastyq jyl saıyn kóptegen sala boıynsha keńeıip keledi.

«Eki el arasyndaǵy ınvestıtsııalyq yntymaqtastyq ózara qarym-qatynastyń mańyzdy baǵyty bolyp otyr. Bıylǵy 1 qazandaǵy jaǵdaı boıynsha Qazaqstanda Birikken Arab Ámirlikteri kapıtalynyń qatysýymen 371 zańdy tulǵa tirkelgen. Qazir 5,1 mlrd AQSh dollary somasyna 22 joba iske asyrýdyń túrli satysynda tur», - dedi Q. Omarov.

«Elder arasyndaǵy ınvestıtsııalar ósiminiń eleýli áleýetin eskere otyryp, eki eldiń ınvestorlaryn qorǵaý jáne qoldaý maqsatynda Qazaqstan Respýblıkasy men Birikken Arab Ámirlikteriniń úkimetteri arasynda Investıtsııalardy kótermeleý jáne ózara qorǵaý týraly kelisimge qol qoıyldy. Kelisim ınvestıtsııalyq ahýaldy jaqsartýǵa jáne elder arasyndaǵy ózara tıimdi saýda-ekonomıkalyq yntymaqtastyqty odan ári damytýǵa yqpal etedi. Qujatty ratıfıkatsııalaý teris áleýmettik-ekonomıkalyq jáne quqyqtyq saldarǵa, sondaı-aq qarjylaı shyǵyndarǵa ákep soqpaıdy», - dedi mınıstrdiń birinshi orynbasary.