Senat Qazaqstan men Armenııanyń qos azamattyqpen kúres jónindegi qujatty maquldady
ASTANA. KAZINFORM — Búgin Senattyń jalpy otyrysynda «Qazaqstan Úkimeti men Armenııa Úkimeti arasyndaǵy kóshi-qon salasyndaǵy yntymaqtastyq týraly kelisimdi ratıfıkatsııalaý týraly» Zańy maquldandy.
Qujatqa Memleket basshysynyń Armenııaǵa resmı sapary barysynda 2024 jylǵy sáýir aıynda qol qoıyldy.
— Kelisimde kóshi-qon, azamattardyń quqyqtaryn qorǵaý, onyń ishinde memleketterdiń zańnamasyna jáne halyqaralyq mindettemelerine sáıkes aqparattyq ózara is-qımyl jasaý salasyndaǵy yntymaqtastyq eskerilgen. Ratıfıkatsııalaýǵa usynylyp otyrǵan qujat aıasynda memleketter statıstıkalyq, quqyqtyq jáne ǵylymı-ádistemelik aqparat almasý, memleketterdiń aýmaqtaryndaǵy azamattar týraly málimettermen almasý, sondaı-aq kóshi-qon salasynda týyndaıtyn máseleler boıynsha tájirıbe almasý jáne naqty kómek kórsetý boıynsha ózara is-qımyldy júzege asyrady, — dedi senator Marat Qojaev.
Budan bólek, qaralyp otyrǵan qujat aıasynda zańsyz kóshi-qonǵa qarsy is-qımyldy júzege asyrý jáne azamattardyń quqyqtaryn qamtamasyz etý maqsatynda memleketter azamattarynyń turǵylyqty jeri boıynsha tirkeý, arnaıy, ýaqytsha jáne turaqty turý mártebesi jónindegi aqparatpen almasýǵa múmkindik jasalady. Mundaı málimetter qos azamattyqqa qarsy kúres, zańsyz kóshi-qon arnalarynyń jolyn kesý úshin qajet.
— Sonymen qatar, qujatta yntymaqtastyq jasaý nysandary naqty belgilenedi. Kelisim múddeli jaqtyń járdem kórsetý týraly suraý salýynyń negizinde júzege asyrylady, ony oryndaý ýaqyty 30 kún merziminen aspaýy tıis. Suraý salý qujatynda kórsetiletin málimetter tizbesi men ony oryndaý tártibi de naqty aıqyndalady.
Memlekettiń egemendigine, qaýipsizdigine, qoǵamdyq tártibine nuqsan keltirýi múmkin nemese zańnamasy men halyqaralyq mindettemelerine qaıshy kelýi múmkin dep uıǵarylsa, qatysýshy memleketter suraý salýdy oryndaýdan tolyq nemese ishinara bas tartýǵa quqyly, — dedi depýtat.
Shartty iske asyratyn quzyretti organdar retinde:
— Qazaqstan jaǵynan — Іshki ister mınıstrligi men Eńbek jáne halyqty áleýmettik qorǵaý mınıstrligi;
— Armenııa jaǵynan — Іshki ister mınıstrliginiń polıtsııa men Kóshi-qon jáne azamattyq qyzmeti belgilengen.
Armıan tarapy Kelisimdi 2025 jylǵy 30 sáýirde ratıfıkatsııalady. Búginde osyndaı eki jaqty kelisim birqatar eldermen jasalǵan, ıaǵnı olardyń arasynda Ázerbaıjan, Belarýs, Qyrǵyzstan, Tájikstan, Ózbekistan, Qytaı Halyq Respýblıkasy bar. Kelisimdi ratıfıkatsııalaý kóshi-qon salasyndaǵy baqylaýdy arttyryp, eki eldiń yntymaqtastyǵyn nyǵaıtýǵa yqpal etedi jáne teris áleýmettik-ekonomıkalyq jáne quqyqtyq saldarǵa ákep soqtyrmaıdy.
Eske salsaq, jaqynda QR Іshki ister mınıstrligi qos azamattyq úshin jazany qatańdatýǵa qatysty túsinik bergen edi.