Senat «Qazaqstan halyq jazýshysy» ataǵyn qaıtaratyn zańdy maquldady
Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine memlekettik nagradalar, memlekettik avıatsııa, qorǵanys ónerkásibi jáne memlekettik qorǵanystyq tapsyrys máseleleri boıynsha ózgerister men tolyqtyrýlar engizý týraly» zańy maquldandy, dep habarlaıdy Kazinform tilshisi.
Atalǵan zańda «Qazaqstan Respýblıkasynyń memlekettik nagradalary týraly», «Qazaqstan Respýblıkasynyń áýe keńistigin paıdalaný jáne avıatsııa qyzmeti týraly», sondaı-aq «Qorǵanys ónerkásibi jáne memlekettik qorǵanystyq tapsyrys týraly» zańdarǵa túzetýler engizilip, jetildirý kózdelgen.
«Birinshiden, Memleket basshysynyń 2023 jylǵy 17 maýsymdaǵy «Ádiletti Qazaqstan – Adal azamat» taqyrybynda ótken Ulttyq quryltaıdyń ekinshi otyrysynda «Halyq jazýshysy» ataǵyn qaıtarý týraly tapsyrmasyna sáıkes, «Qazaqstan Respýblıkasynyń memlekettik nagradalary týraly» Zańǵa ózgerister engizý eskerilgen. «Qazaqstannyń halyq jazýshysy» ataǵy – elimizdiń ádebıetin damytýǵa erekshe úles qosqan, buryn «Qazaqstannyń eńbek sińirgen qaıratkeri» jáne Qazaqstan Respýblıkasy Memlekettik syılyǵynyń laýreaty atanǵan tulǵalarǵa beriletin bolady. Sondaı-aq, ult ádebıetin jańa deńgeıge kótergen, ádebı shyǵarmashylyq ortanyń eń joǵarǵy syılyǵy bolady», - dedi senator Gennadıı Shıpovskıh.
Qazaqstan Respýblıkasynyń áýe keńistigin paıdalaný jáne avıatsııa qyzmeti týraly» Zańǵa túzetýler arqylyn memlekettik avıatsııa salasyndaǵy ýákiletti organnyń memlekettik avıatsııada ushý jumysyn uıymdastyrý jónindegi, memlekettik avıatsııadaǵy áýe saparyn obektıvti túrde baqylaýdy uıymdastyrý jónindegi jáne Qazaqstan Respýblıkasy memlekettik avıatsııasy personalynyń synyptyq dárejesin berý týraly nusqaýlyqtardy ázirleý jáne bekitý quzyreti bekitiledi.
«Budan bólek, memlekettiń kúsh qurylymdary sanalatyn memlekettik tapsyrys berýshiler qarý-jaraqtyń, áskerı tehnıkanyń, basqa da áskerı múliktiń, sondaı-aq jumystar men qyzmetterdiń zamanaýı úlgilerin alýǵa múddeli. Sondyqtan óndiristi jańǵyrtý, usynylatyn taýarlar men qyzmetterdiń sapasyn jaqsartý, jergilikti qamtý úlesin arttyrý qorǵanys ónerkásibi úshin de, memlekettik qorǵanys tapsyrysy úshin de mańyzdy. Budan ózge, Zańda qorǵanys ónerkásibi ári memlekettik qorǵanys tapsyrysy salasyndaǵy ýákiletti organnyń oq-dáriler men jarylǵysh zattardy kádege jaratý obektileriniń óndiristik qyzmetin uıymdastyrý, osy jumystardy júrgizý kezinde qaýipsizdikti qamtamasyz etý jáne oq-dáriler men jarylǵysh zattardy kádege jaratý obektilerin kúzetý jónindegi qaǵıdalardy ázirleý, sondaı-aq bekitý bóliginde quzyreti naqtylanǵan. Qarý-jaraq pen áskerı tehnıkany jedel qalpyna keltirý maqsatynda Zańda qosalqy bólshekterdi satyp alý rásimin ońaılatý jáne olardy memlekettik satyp alý rásimi arqyly ótkizý usynylǵan», - dedi senator.
Aıta keteıik, bıyl maýsym aıynda Ulttyq quryltaıdyń negizgi otyrysynda Prezıdent Qasym-Jomart Toqaev «Qazaqstannyń Halyq jazýshysy» ataǵyn qaıtarýdy tapsyrǵan edi.
