Senat qazaq-qyrǵyz odaqtastyǵyn tereńdetetin zańdy maquldady
ASTANA. KAZINFORM — Senat «Qazaqstan men Qyrǵyz Respýblıkasy arasyndaǵy odaqtastyq qatynastardy tereńdetý jáne keńeıtý týraly shartty ratıfıkatsııalaý týraly» Zańdy maquldady
Qujatty tanystyrǵan senator Darhan Qydyráli qujatqa Qyrǵyz Prezıdentiniń Qazaqstanǵa 2024 jyldyń sáýirinde jasaǵan sapary kezinde qol qoıylǵanyn eske saldy.
— 22 baptan turatyn, kórshiles elder arasyndaǵy barlyq baǵyttaǵy odaqtastyqty jan-jaqty tereńdetýdi kózdeıtin Shart saıası, saýda-ekonomıkalyq, kólik-tranzıttik, áskerı-tehnıkalyq, qaýipsizdik, óńiraralyq yqpaldastyq, aýyl sharýashylyǵy, azyq-túlik, sý resýrstary, energetıka, ekologııa, bilim berý, mádenı-rýhanı salalardaǵy yntymaqtastyqty keńeıtýge baǵyttalǵan, — dedi depýtat.
Shartta Joǵary Memleketaralyq Keńes aıasynda jáne Qazaqstan Parlamenti men Qyrǵyz Respýblıkasy Jogarký Keneshi arasyndaǵy yntymaqtastyq jónindegi Parlamentaralyq Keńes sheńberinde baılanystardy nyǵaıtý máseleleri qarastyrylǵan.
— Shartty ratıfıkatsııalaý — óńirdegi saıası dıalogty, ekonomıkalyq-áleýmettik, gýmanıtarlyq baılanystardy jáne qaýipsizdikti qamtamasyz etý salasyndaǵy ózara is-qımyldy damytý arqyly kórshiles eki eldiń yrysty yntymaǵyna berik negiz bolady degen oıdamyz. Osyǵan baılanysty, Shart elderimizdiń múddelerine saı keledi dep paıymdaımyz, — dedi Darhan Qydyráli.
Aıta ketý kerek, qyrǵyz taraby ratıfıkatsııa rásimderin 2024 jyldyń jeltoqsanynda aıaqtaǵan.
Buǵan deıin Qazaqstan men Qyrǵyz Respýblıkasy shekara mańyndaǵy agroónimder saýdasyn jandandyrýǵa peıildi ekenin jazǵan edik.