Senat qaýipsizdik jáne arnaýly memorgandardaǵy qyzmet týraly zańdy Májiliske qaıtardy

Senat zańnamaǵa qaýipsizdik jáne arnaýly memlekettik organdardaǵy qyzmet týraly ózgeris engizetin zańdy eki oqylymda qarap, Májiliske keri qaıtardy, dep habarlaıdy Kazinform. 

Qujattyń tolyq ataýy — Qazaqstan Respýblıkasynyń keıbir zańnamalyq aktilerine ulttyq qaýipsizdikti qamtamasyz etý jáne Qazaqstannyń arnaýly memlekettik organdaryndaǵy qyzmet máseleleri boıynsha ózgerister men tolyqtyrýlar engizý týraly zań.

Zańǵa ekinshi oqylymda qorytyndy jasaǵan Senattyń halyqaralyq qatynastar, qorǵanys jáne qaýipsizdik komıtetiniń múshesi Ǵalıasqar Sarybaev Májilis qabyldaǵan zańǵa birneshe baǵyt boıynsha ózgertýler men tolyqtyrýlar engizý qajettigin aıtty.

Olar:

— adam quqyǵy men bostandyǵyn shekteýge qatysty normalardy Konstıtýtsııalyq Sottyń normatıvtik qaýlysyna sáıkestendirý;
— aldyn ala tergeý úlgisinde aıaqtalǵan ózge de qylmystyq quqyq buzýshylyqtar týraly isterge qatysty sotqa deıingi tergep-tekserý organdary arasynda ókilettikterdiń arajigin ajyratý, olardyń jaýapkershilik aımaqtaryn aıqyndaý, úsh býyndy modeldi endirýdi kózdeıtin normalardy qoldanysqa engizý merzimin aýystyrý;
— memlekettik qupııalardan turatyn málimetterdi berý tártibin aıqyndaý quzyretin belgileýdegi qaıtalanatyn normalardy alyp tastaý;
— Qazaqstan Respýblıkasynyń azamattaryna qatysty erikti daktıloskopııalyq tirkeýdi engizý bóliginde normalardy naqtylaý;
— Zańnyń keıbir erejelerin qoldanystaǵy zańnamanyń erejelerine sáıkes keltirý.

«Baıandalǵandy eskere kele, Zańnyń jekelegen baptaryn maquldamaýdy jáne Zańnyń kórsetilgen baptarynyń jańa redaktsııasyn usyna otyryp, ony Májiliske qaıtarýdy usynady», — dedi ol.

Senatorlar bul usynysty qoldap, zańnyń jekelegen baptaryn maquldamady.

Osylaısha zań jańa redaktsııasymen Májiliske qaıtaryldy.