Senat Qatarmen birlesken áskerı oqý-jattyǵý ótkizýge arnalǵan zańdy maquldady
ASTANA. KAZINFORM – Búgin Senattyń jalpy otyrysynda «Qazaqstan Respýblıkasynyń Úkimeti men Qatar memleketiniń Úkimeti arasyndaǵy áskerı yntymaqtastyq týraly kelisimdi ratıfıkatsııalaý týraly» Zańy maquldandy.
Zań 2023 jylǵy 12 jeltoqsanda Dohada qol qoıylǵan Qazaqstan men Katar úkimetteri arasyndaǵy áskerı yntymaqtastyq týraly kelisimdi ratıfıkatsııalaýǵa baǵyttalǵan.
«Kelisimdi ratıfıkatsııalaý eki memleket arasyndaǵy áskerı bilim berýge, áskerı qyzmetshilerdi daıarlaýǵa, áskerı medıtsına, ǵylym, mádenı, sport salasynda yntymaqtastyq is-sharalaryn ótkizýge jáne ózge de salalalarda kelisilgen qyzmetter men jumystardy atqarýǵa múmkindik beredi. Sondaı-aq qyzmetshilerdi tilge úıretý, aqparattardyń qupııalyǵyn saqtaý, kedendik rásimdeý, daýlardy sheshý, tájirıbe almasý, birlesken oqý-jattyǵý ótkizý, beıbitshilik pen bitimgerlikti qoldaý operatsııalarda konsýltatsııalar alý qarastyrylǵan, zań máseleleri boıynsha túzetýler engizý tártibi aıqyndalǵan», - dedi senator Ǵalıasqar Sarybaev
Onyń aıtýynsha, kelisimde jaýyngerlik daıarlyq is-sharalaryn ótkizý kezinde memleketterdiń áýe keńistigin jáne áskerı polıgondaryn ózara kelisilgen merzimderde paıdalaný, tehnıkalardy tasymaldaý múmkindigi eskerilgen.
«Qazaqstan jáne Qatar úkimetteriniń zańdy iske asyrý jónindegi ýákiletti organdary retinde eki eldiń qorǵanys mınıstrlikteri belgilengen. Ýákiletti organdar taraptardyń qyzmetin aıqyndaıdy, uıymdastyrady jáne úılestiredi, qajet bolǵan jaǵdaıda birlesken jumys tobyn qurady.
Jumys toby ýákiletti organdardyń kelisimi boıynsha eki memlekettiń aýmaǵynda kezekpen otyrystaryn ótkizedi. Kelisim 5 jyl merzimge jasaldy. Eger aǵymdaǵy merzim aıaqtalǵanǵa deıin taraptar alty aıdan keshiktirmeı kelisimniń qoldanysyn toqtatý týraly habardar etpese, ýaǵdalastyq kelesi bes jylǵa avtomatty túrde uzartylady. Eki el arasynda tyǵyz saıası dıalog, ekonomıkalyq seriktestik jáne mádenı–gýmanıtarlyq baılanystar nyǵaıyp keledi. Qatar memleketi – Islam álemindegi bizdiń senimdi jáne mańyzdy áriptesimiz», - dedi depýtat.
Aıta keteıik, bıyl qazan aıynda Parlament Májilisi Qazaqstan men Qatar arasynda áskerı yntymaqtastyqty nyǵaıtýǵa baǵyttalǵan osy zańdy qabyldaǵan edi.
