Senat Kaspııde tosyn oqıǵalardyń aldyn alýǵa negizdelgen qujatty qabyldady
Atalǵan kelisimge 2018 jylǵy tamyzda Aqtaý qalasynda qol qoıyldy.
«Qujattyń maqsaty - teńizdegi Kaspıı mańy memleketteriniń aýmaqtyq sýlarynan tys áskerı kemeleriniń júzýi men onyń ústindegi áýe keńistigindegi áýe kemeleriniń ushý qaýipsizdigin qamtamasyz etý. Kelisimniń erejelerine sáıkes, ár taraptyń áskerı jáne áýe kemeleri basqa taraptyń áskerı korablderi men áýe kemelerine jaqyndaǵan kezde qaýipsiz ara qashyqtyqta bolýy jáne barynsha saqtyq tanytýy qajet», - dedi QR Qorǵanys mınıstriniń orynbasary Baqyt Qurmanbaev.
Sonymen qatar, áskerı kemeler men áýe kemeleri bir-birine jaqyndaǵan kezde tyıym salynatyn áreketter aıtyldy.
Birinshiden, jeke quramnyń densaýlyǵyna zııan keltiretin nemese teńizde júzý nemese ushý úshin kederge týdyratyn áreketterge, shabýyldardy ımıtatsııalaýǵa, qandaı da bir zattardy tastaýǵa, kemelerdi basqarýda kedergi keltiretindeı jaryqtandyrý quraldaryn paıdalanýǵa ruqsat etilmeıdi.
Taraptar óz áskerı kemeleri komandırleriniń 1972 jylǵy Teńizde kemeler soqtyǵysýynyń aldyn alýdyń halyqaralyq qaǵıdalaryn múltiksiz saqtaýy baıynsha sharalardy qabyldaýy kerek.
«Aqparat almasý jáne ózara túsinistikke qol jetkizý úshin áskerı korablder men áýe kemeleri kelisimde aıqyndalǵan jıilikterdegi radıobaılanysty paıdalandy. Kemelerdiń is-qımyldary memleketterdiń egemendigi men aıryqsha quqyqtaryna zııan keltirmeı júzege asyrylady. Kelisimdi iske asyrý - teńizdegi Kaspıı mańy memleketteriniń áskerı kemeleri men ushaqtary arasyndaǵy ózara dostyq qarym-qatynasty arttyrýǵa múmkindik beredi», - dedi Baqyt Qurmanbaev.
