Senat kásipkerlik qyzmetke zańsyz aralasýdan qorǵaıtyn zańdy qabyldady

NUR-SULTAN. QazAqparat – Parlament Senatynyń «Qazaqstan Respýblıkasynyń keıbir zańnamalyq aktilerine reıderlikke qarsy kúresti kúsheıtý, kásipkerlik qyzmetti memlekettik organdar men laýazymdy adamdardyń zańsyz aralasýynan qorǵaý jáne baǵaly metaldardyń zańsyz aınalymyna kedergi keltiretin sharalardy kúsheıtý máseleleri boıynsha ózgerister men tolyqtyrýlar engizý týraly» Zańy eki oqylymda qaralyp, qabyldandy, dep habarlaıdy QazAqparat tilshisi.

Zań jobasyna Qazaqstan Respýblıkasy Parlamentiniń depýtattary bastamashylyq jasady.

Qujattyń negizgi mindeti - Qylmystyq, Qylmystyq-protsestik kodeksterge, «Prokýratýra týraly» jáne «Baǵaly metaldar men asyl tastar týraly» zańdarǵa ózgerister men tolyqtyrýlar engizý.

Tutastaı alǵanda, zań jobasynyń normalary azamattardyń quqyqtaryn qorǵaýdy arttyrýǵa, prokýratýra qadaǵalaýyn kásipkerler problemalaryn tıimdi sheshýge qaıta baǵyttaýǵa, kásipkerlik qyzmetke zańsyz aralasýdan kepildikterdi kúsheıtýge, sondaı-aq baǵaly metaldardyń zańsyz aınalymyna qarsy kúreske múmkindik beredi.

«Bul Zań Memleket basshysynyń Joldaýynda aıtylǵan tapsyrmalardy oryndaý maqsatymen qabyldanyp otyr. Soǵan sáıkes, kásipkerlermizdi reıderlikten jáne quqyq qorǵaý men baqylaýshy organdardyń zańsyz is-áreketterinen qorǵaý úshin qosymsha júıeli sharalar qabyldandy. Qabyldanǵan túzetýler aldaǵy ýaqytta kásipkerlikti yntalandyrýǵa jáne ony qorǵaý men qoldaýdy qamtamasyz etýge arnalǵan qosymsha quqyqtyq negizder qalyptastyrady», - dedi Senat tóraǵasy Máýlen Áshimbaev.