Senat qarý ıelerine qoıylatyn talaptardy kúsheıtetin qujatty maquldady

ASTANA. KAZINFORM – Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine kúzet qyzmeti, turǵyn úı qatynastary jáne quqyq qorǵaý qyzmeti máseleleri boıynsha ózgerister men tolyqtyrýlar engizý týraly» Zań maquldandy.

- Zańnyń negizgi maqsaty - kúzet qyzmetin júzege asyratyn sýbektilerdiń qyzmetin jetildirý, qarý ıelerine qoıylatyn talaptardy kúsheıtý, quqyq qorǵaý organdarynyń, arnaýly memlekettik organdardyń, azamattyq qorǵaý organdarynyń qyzmetkerleri men áskerı qyzmetshilerdi turǵyn úımen qamtamasyz etý jáne turǵyn úı tólemderin júzege asyrý tártibin jetildirý. Qaralyp otyrǵan zań kelesi negizgi erejelerdi qamtıdy. Birinshiden, «Turǵyn úı qatynastary týraly» Zańyna turǵyn úı tólemderin berý, esepteý tártibin aıqyndaý boıynsha ókilettikti Qazaqstan Respýblıkasynyń Úkimetine berý bóliginde túzetýler engiziledi. Osyǵan baılanysty, quqyq qorǵaý, arnaýly memlekettik organdar, azamattyq qorǵaý organy qyzmetkerleriniń jáne áskerı qyzmetshilerdiń turǵyn úı tólemderin alýǵa quqyqtary men olardyń mindetteri osy zańmen bekitilip, al osy quqyqtardy iske asyrý tetigi zańǵa táýeldi aktilerde kózdeletin bolady, - dedi senator Sovetbek Medebaev.

Bul túzetýler normalardyń artyq reglamenttelýin boldyrmaýǵa jáne zańǵa táýeldi aktilerdegi quqyqtyq qatynastardy retteýge múmkindik beredi.

Ekinshiden, «Jekelegen qarý túrleriniń aınalymyna memlekettik baqylaý jasaý týraly» Zańynda azamattyq jáne qyzmettik qarý ıeleri úshin qosymsha mindetter bekitiledi. 

Úshinshiden. «Kúzet qyzmeti týraly» Zańynda:

- kúzet qyzmeti salasyndaǵy sýbektilerdiń qyzmeti týraly eseptilikti ýákiletti organǵa usynýy boıynsha mindetteri bekitiledi.

- jeke kúzet uıymynyń fılıaly men ókildiginiń basshylaryna qoıylatyn mindetti talaptar engiziledi. Qazirgi ýaqytta bul talaptar jeke kúzet uıymynyń basshylary men kúzetshilerine ǵana qoldanylady. Tórtinshiden. «Temirjol kóligi týraly» Zańynda «áskerılendirilgen temirjol kúzeti» degen uǵym engiziledi jáne onyń quqyqtyq mártebesi bekitiledi.

Budan basqa oǵan tranzıttik temirjol júk tasymaldaryn júzege asyrýǵa tartylǵan termınaldar aýmaqtarynda úshinshi tulǵalarǵa júkterdi jáne temirjol kóligi obektilerin kúzetý jónindegi qyzmetterdi kórsetý quqyǵy beriledi. 

- Sonymen qatar, «Memlekettik quqyqtyq statıstıka jáne arnaıy esepke alý týraly» Zańynda ýákiletti organnyń qylmystyq qaterlerdi anyqtaý jónindegi boljamdy-taldamalyq qyzmetti júzege asyrý nátıjeleri boıynsha usynystar ázirleý, olardy quqyqtyq statıstıka jáne arnaıy esepke alý sýbektilerine jiberý bóligindegi quzyreti keńeıtiledi, - dedi depýtat.

Senator Janna Asanovanyń sózine qaraǵanda, osy jylǵy 1 qańtardaǵy jaǵdaı boıynsha ishki ister organdarynda esepte 4 463 jeke kúzet uıymy tirkelgen. Kúzetshiler sany 97 myńnan asady. Jeke kúzet uıymdary polıtsııa qyzmetkerlerimen teń dárejede kúzetiletin obektilerdiń qaýipsizdigin, qoǵamdyq tártipti qamtamasyz etýdi júzege asyrady.

Aıta keteıik, byltyr jeltoqsan aıynda qarý ıeleri men kúzet qyzmeti uıymdaryna talaptar kúsheıtiletinin jazǵan edik.