Senat qandastarǵa áleýmettik qoldaý kórsetetin qujatty maquldady
ASTANA. KAZINFORM — Búgin Senattyń jalpy otyrysynda «Qazaqstan Úkimeti men Mońǵolııa Úkimeti arasyndaǵy zeınetaqy salasyndaǵy yntymaqtastyq týraly kelisimdi ratıfıkatsııalaý týraly» Zań maquldandy.
Qazaqstan men Mońǵolııa arasynda zeınetaqymen qamsyzdandyrý salasyndaǵy ekijaqty yntymaqtastyqty jandandyrýǵa baǵytalǵan kelisimge Memleket basshysynyń 2024 jylǵy 29 qazanda Mońǵolııaǵa resmı sapary aıasynda Ulan-Batyr qalasynda qol qoıyldy.
- Qaralyp otyrǵan zań – osy halyqaralyq kelisimdi ratıfıkatsııalaýdy kózdeıdi. Kelisimniń maqsaty – adamdarǵa zeınetaqy tólemderin taǵaıyndaý salasyndaǵy quqyqtyq qatynastardy retteý. Atap aıtqanda, yntymaqty zeınetaqy salasynda eńbek ótilin ózara taný, sondaı-aq áskerı qyzmet ótkerý kezeńderi men joǵary jáne orta arnaýly bilim berý uıymdarynda oqý ýaqytyn eńbek ótiline esepke alý tetikteri qarastyrylady. Munymen qosa, Kelisimmen Qazaqstan men Mońǵolııa arasynda jınaqtaýshy zeınetaqy eksporty boıynsha yntymaqtastyqtyń jańa formasy kózdelip otyr. Bul azamattardyń zeınetaqy jınaqtaryn basqa memlekettiń aýmaǵynda paıdalaný múmkindigin qamtamasyz etýge baǵyttalǵan, - dedi senator Amangeldi Esbaı.
Onyń aıtýynsha, osy qujat aıasynda zeınetaqy tólemderin taǵaıyndaý úshin eki eldiń aýmaǵynda jınaqtalǵan eńbek ótilin rastaý tártibi bekitiledi. Bul óz kezeginde azamattardyń áleýmettik quqyqtaryn qorǵaý turǵysynan mańyzdy qadam sanalady. Kelisim aıasynda ýákiletti organdar retinde Qazaqstan tarapynan Eńbek jáne halyqty áleýmettik qorǵaý mınıstrligi, Mońǵolııa jaǵynan Otbasy, eńbek, jáne áleýmettik qorǵaý mınıstrligi aıqyndalǵan. Qujatty ratıfıkatsııalaý eki el azamattarynyń zeınetaqymen qamsyzdandyrý salasyndaǵy quqyqtaryn qamtamasyz etip, Qazaqstan men Mońǵolııa azamattarynyń kóshý nemese turaqty turý jaǵdaıynda eńbek ótilin tanýǵa jáne esepke alýǵa múmkindikter beredi.
Óz kezeginde senator Altynbek Nýhuly bul qujat qandastar úshin naqty áleýmettik qoldaý kórsetýge múmkindik beretinin aıtty.
- Máselen, Іshki ister mınıstrliginiń málimetine sáıkes, byltyrǵy 1 qazandaǵy jaǵdaı boıynsha Mońǵolııadan Qazaqstanǵa turaqty turýǵa 6654 azamat kóshken, onyń ishinde 6109-y qandas retinde tirkeldi. Eńbek jáne halyqty áleýmettik qorǵaý mınıstrliginiń derekteri boıynsha 1800 azamatqa zeınetaqy tólemderi taǵaıyndalǵan. Osy Kelisim kúshine engen kezde, osyndaı 400-ge jýyq azamatqa eńbek ótilin qaıta esepteý jáne zeınetaqy tólemderin qaıta qarastyrý josparlanǵan. Sondaı-aq, bul qujat Mońǵolııa aýmaǵynda ómir súrip jatqan nemese jumys istegen Qazaqstan azamattary úshin de naqty qoldaý bolmaq, - dedi A. Nýhuly.
Eske salsaq, atalǵan zańdy Parlament Májilisi byltyr jeltoqsan aıynda qabyldaǵanyn jazǵan edik.