Senat Ystyqkóldegi elimizdiń menshik quqyqtaryn retteıtin qujattardy qaraıdy

Eń aldymen kún tártibine Senat depýtaty N.S.Baıqadamovtyń ókilettigin toqtatý týraly másele shyǵarylady.

Odan keıin senatorlar «2006 jylǵy 4 shildedegi Qazaqstan Respýblıkasynyń Úkimeti men Qyrǵyz Respýblıkasynyń Úkimeti arasyndaǵy Qyrǵyz Respýblıkasy Ystyqkól oblysynyń aýmaǵynda ornalasqan kýrorttyq-rekreatsııalyq sharýashylyq obektilerine Qazaqstan Respýblıkasynyń menshik quqyqtaryn retteý týraly kelisimdi jáne 2006 jylǵy 4 shildedegi Qazaqstan Respýblıkasynyń Úkimeti men Qyrǵyz Respýblıkasynyń Úkimeti arasyndaǵy Qyrǵyz Respýblıkasy Ystyqkól oblysynyń aýmaǵynda ornalasqan kýrorttyq-rekreatsııalyq sharýashylyq obektilerine Qazaqstan Respýblıkasynyń menshik quqyqtaryn retteý týraly kelisimge ózgerister men tolyqtyrýlar engizý týraly hattamany ratıfıkatsııalaý týraly» Qazaqstan Respýblıkasynyń Zańyn talqylaıdy. Bul qujattardy Májilis 2025 jyldyń 29 jeltoqsanynda qabyldanǵan edi.

- Qyrǵyz Respýblıkasynyń Ystyqkól oblysy aýmaǵynda Qazaqstannyń menshigi retinde tanylǵan kelesi 4 sanatorıı jumys istep tur. Olardyń arasynda: Qazaqstan Respýblıkasy Prezıdentiniń Іs basqarmasy qaramaǵyndaǵy «Qazaqstan» sanatorııi, Ǵylym jáne joǵary bilim mınıstrliginiń «Samal» demalys úıi, «Ýnıversıtet» sporttyq-saýyqtyrý lageri, sondaı-aq Týrızm jáne sport mınıstrliginiń «Olımp» demalys bazasy bar, - degen edi sol kezde Qarjy mınıstri Mádı Takıev.

Taraptardyń obektiler boıynsha ózara is-qımyldary, eki eldiń Úkimetter deńgeıinde jasalǵan tómendegi halyqaralyq sharttar aıasynda júzege asyrylady:

– birinshiden, «2006 jylǵy 4 shildedegi Qazaqstan Respýblıkasynyń menshik quqyqtaryn retteý týraly» Kelisim.

– ekinshiden, «2009 jylǵy 1 jeltoqsandaǵy jer ýchaskelerin jalǵa berý týraly» Shart.

Bul Kelisim jáne Shart Qazaqstan Respýblıkasynyń Úkimeti qaýlysymen bekitilgen. Eki jaqty qatynastardyń ózekti máseleleriniń biri – 4 kýrorttyq-sanatorlyq keshenge qatysty halyqaralyq sharttar boıynsha qazaqstandyq taraptyń mindettemelerdi oryndaýy.

Sonymen qatar «Bir taraptan Eýrazııalyq ekonomıkalyq odaq pen oǵan múshe memleketter jáne ekinshi taraptan Mońǵolııa arasyndaǵy ýaqytsha saýda kelisimin ratıfıkatsııalaý týraly» Qazaqstan Respýblıkasynyń Zańy talqyǵa salady. Bul zańdy Májilis 4 aqpanda qabyldady.

Kelisim EEAO elderi men Mońǵolııa arasynda 367 taýarlarǵa qatysty ımporttyq kedendik bajdardy joıýdy kózdeıdi. Kelisim 3 jylǵa jasalady jáne taǵy 3 jylǵa avtomatty túrde uzartylady. Qujat tehnıkalyq, sonymen qatar sanıtarlyq, fıtosanıtarlyq sharalar, kedendik yntymaqtastyq, ishki naryqty qorǵaý sharalary sııaqty basqa da saýda máselelerin qamtıdy.

Senattyń jalpy otyrysy aıasynda BAQ ókilderine arnalǵan brıfıngter ótkizý josparlanǵan. Onyń barysynda senatorlar Nýrııa Nııazova men Shákárim Buqtuǵutov jáne Qarjy vıtse-mınıstri Dáýren Temirbekov Saýda jáne ıntegratsııa vıtse-mınıstri Janel Kýshýkova tilshiler tarapynan týyndaıtyn saýaldarǵa jaýap beredi.

Aıta keteıik, ótken aptada Senat spıkeri Máýlen Áshimbaevtyń tóraǵalyǵymen ótken palata otyrysynda senatorlar kreatıvti ındýstrııalardy qoldaý jáne damytý máseleleri jónindegi zańdy maquldady. 

Depýtattar bastamashy bolǵan «Qazaqstan Respýblıkasynyń keıbir zańnamalyq aktilerine kreatıvti ındýstrııalardy qoldaý jáne damytý máseleleri boıynsha ózgerister men tolyqtyrýlar engizý týraly» zań ulttyq mádenıet salasyn zaman talaptaryna saı jańǵyrtýdy kózdeıdi.

— Atalǵan zań Parlament depýtattarynyń bastamasymen ázirlendi. Memleket basshysy 2023 jylǵy 1 qyrkúıektegi «Ádiletti Qazaqstannyń ekonomıkalyq baǵdary» atty Qazaqstan halqyna Joldaýynda elimizde kreatıvti ekonomıkanyń jan-jaqty damýyna barlyq jaǵdaı jasaý qajettigin atap ótken bolatyn. Usynylyp otyrǵan zań osy tapsyrmany iske asyrýǵa baǵyttalǵan. Zańnyń maqsaty — elimizde kreatıvti ındýstrııany derbes ári ekonomıkalyq mańyzy bar sektor retinde qalyptastyrý, sondaı-aq shyǵarmashylyq áleýetti ekonomıkalyq aınalymǵa tartý úshin ınstıtýtsıonaldyq jáne quqyqtyq negizderdi aıqyndaý. Bul rette kreatıvti ındýstrııa ekonomıkany ártaraptandyrýǵa, jańa jumys oryndaryn qurýǵa jáne shaǵyn ári orta bıznestiń damýyna yqpal etetin perspektıvaly baǵyt retinde qarastyrylady, — dedi zań boıynsha baıandama jasaǵan senator Aıgúl Qapbarova.

Atalǵan zańmen «Mádenıet týraly», «Kınematografııa týraly», «Memlekettik jastar saıasaty týraly» jáne «Memlekettik múlik týraly» zańdarǵa ózgerister men tolyqtyrýlar engiziledi.

Senattyń Áleýmettik-mádenı damý jáne ǵylym komıtetiniń málimetine qaraǵanda, «Mádenıet týraly» zańǵa mynadaı negizgi normalar engiziledi:

— tujyrymdamalyq apparat keńeıtiledi (kreatıvti ındýstrııalardyń jumyskeri men sýbektisiniń anyqtamalary, sondaı-aq esepke alýdyń onlaın-platformasy jáne qoldaý retinde kreatıvti ındýstrııalar sýbektileriniń tizilimi engiziledi);

— kreatıvti ındýstrııalar quqyqtyq retteý salasyna engiziledi, mádenı jáne kreatıvti qyzmet týraly erejeler naqtylanady;

— mádenıet salasyndaǵy ýákiletti organnyń tizilimdi qalyptastyrý jáne júrgizý, memlekettik mádenıet uıymdarynyń múlkin jalǵa alý qaǵıdalaryn bekitý, sondaı-aq memlekettik qosa qarjylandyrý kezinde jeke ınvestıtsııalardy tartý monıtorıngi jónindegi quzyreti aıqyndalady;

— ákimdikterge kreatıvti ındýstrııalardaǵy kásipkerlik arqyly ózin-ózi tanytýy jáne talanttardy damytý úshin jaǵdaı jasaý jóninde ókilettikter beriledi;

— kreatıvti ındýstrııa jumyskerleriniń quqyqtary bekitiledi (aqparatty qorǵaý, úshinshi tulǵalardy tartý, kásibı birlestikterge qatysý, mádenı uıymdarǵa qol jetkizý);

— uıymdastyrýshylardyń sheteldik ujymdar men oryndaýshylardyń qatysýymen oıyn-saýyq mádenı-buqaralyq is-sharalardy ótkizýdi olar ótkizilgenge deıin 30 jumys kúni buryn kelisý mindeti belgilenedi, kelisý tártibin ýákiletti organ aıqyndaıdy;

Budan bólek, «Kınematografııa týraly» zańǵa mynadaı normalar engiziledi:

— fılmge prokattaý kýáligin alýǵa ótinishti qaraý merzimin 7-den 30 jumys kúnine deıin ulǵaıtý;

— ýákiletti organnyń zańda belgilengen belgilerdi anyqtaý jáne fılmdi kórýdiń jas sanatyn aıqyndaý úshin saraptama komıssııasynyń fılmge prokatqa deıingi saraptama júrgizýi, sondaı-aq mundaı komıssııanyń uıymdastyrylý jáne jumys isteý tártibin aıqyndaýy.

– Qaralǵan zań elimizdegi kreatıvti ındýstrııa salasyn retteıtin zańnamany odan ári jetildirýdi kózdeıdi. Atap aıtqanda, salany qoldaýǵa baǵyttalǵan birqatar jańa tetikter engizilip otyr. Sonymen qatar ókiletti organnyń quzyretteri naqtylanyp, qosymsha mindetter júkteldi. Jalpy, zań elimizdiń kreatıvti ekonomıka sektorynyń odan ári damýyna tyń serpin beredi dep senemiz, – dedi otyrysty qorytyndylaǵan Senat tóraǵasy Máýlen Áshimbaev.