Senat Ystyqkólde Qazaqstannyń basqarýyndaǵy nysandarǵa qatysty zańdy maquldady

Senattyń Qarjy jáne bıýdjet komıtetiniń málimetinshe, zań aıasynda kelisimde kýrorttyq-rekreatsııalyq sharýashylyqtardyń tórt obektisine: «Qazaqstan» sanatorııine, «Samal» demalys úıine, «Ýnıversıtet» sport-saýyqtyrý lagerine jáne «Olımp» sport-saýyqtyrý ortalyǵyna Qazaqstan Respýblıkasynyń menshik quqyǵy belgilenedi. Qujat Qazaqstan tarapynyń obektilerdi (bazany qospaǵanda) jańǵyrtý jónindegi mindettemelerin 2029 jyldyń sońyna deıin jyl boıy jumys rejımi bar 3 jáne 4 juldyzdy qonaqúıler deńgeıine deıin uzartady. Sondaı-aq obektilerdi salý kezeńinde de, paıdalaný kezinde de jumys kúshiniń keminde 80%-yn Qyrǵyz Respýblıkasynyń azamattary qatarynan tartý jónindegi talap belgilenedi. Túzetýleri bar hattama sondaı-aq osy mindettemelerdi oryndaý úshin ınvestorlardy tartý múmkindigin kózdeıdi.

Sonymen qatar, palata depýtattary 2009 jylǵy 1 jeltoqsandaǵy Qazaqstan Respýblıkasynyń Úkimeti men Qyrǵyz Respýblıkasynyń Úkimeti arasyndaǵy Qyrǵyz Respýblıkasy Ystyqkól oblysynyń Ystyqkól aýdanyndaǵy jer ýchaskelerin jalǵa berý týraly shartqa ózgerister men tolyqtyrýlar engizý týraly hattamany ratıfıkatsııalaý týraly zańdy maquldady.

Qazaqstan Úkimeti men Qyrǵyzstan Úkimeti arasyndaǵy 2009 jylǵy 1 jeltoqsandaǵy shartqa sáıkes, Qazaqstan tarapyna «Qazaqstan» sanatorııiniń (17,5 ga), «Ýnıversıtet» pansıonatynyń (17,4 ga), «Samal» demalys úıiniń (9,2 ga) jáne «Olımp» pansıonatynyń (14,7 ga) aýmaǵyn qosa alǵanda, Qyrǵyz Respýblıkasy Ystyqkól oblysynyń Ystyqkól aýdanynda ornalasqan jalpy aýdany 58,8 ga jer ýchaskeleri 49 jyl merzimge ýaqytsha óteýli paıdalanýǵa (jalǵa) berildi.

- Sharttyń jáne oǵan ózgerister engizý týraly Hattamanyń erejelerimen 2006 jylǵy 4 shildedegi Ystyqkól oblysyndaǵy kýrorttyq-rekreatsııalyq sharýashylyq obektilerine Qazaqstan Respýblıkasynyń menshik quqyqtaryn retteý jónindegi osy qujattarda belgilengen mindettemelerdiń oryndalýy reglamentteledi. Qujat taraptardyń ózara kepildikterin bekitedi, Qazaqstandyq tarap jer ýchaskelerin jáne olarda ornalasqan múliktik keshendi qatań nysanaly paıdalanýdy qamtamasyz etý jónindegi mindettemelerdi qabyldaıdy, al Qyrǵyz tarapy jalǵa beriletin obektilerge qol suǵylmaýshylyqqa kepildik beredi jáne olardy memlekettik menshikke alyp qoıýǵa baǵyttalǵan is-áreketterden bas tartýǵa mindettenedi, - delingen Senat komıtetiniń aqparatynda.

Shartqa engizilgen, ınvestıtsııalyq qyzmetti yntalandyrýǵa baǵyttalǵan ózgerister erekshe mańyzǵa ıe. Belgilengen normalar obektilerdi damytý jáne jańǵyrtý jónindegi mindettemelerdi oryndaý úshin syrtqy ınvestıtsııalardy tartýǵa múmkindik beredi, bul Qazaqstandyq taraptyń memleketaralyq kelisimderdiń talaptaryn tıimdi oryndaýyna jáne kýrorttyq keshenniń materıaldyq-tehnıkalyq bazasynyń sapasyn arttyrýǵa yqpal etedi.

Buǵan deıin habarlanǵandaı, Qyrǵyzstanda Ystyqkóldi Almatymen baılanystyratyn jol ashyldy.