Senat ishki astyq naryǵyna qatysty zańdy qabyldady
NUR-SULTAN. QazAqparat – Parlament Senatynyń jalpy otyrysynda palata depýtattary «Astyq týraly» Qazaqstan Respýblıkasynyń Zańyna tolyqtyrýlar engizý týraly» Zańyn qabyldady, dep habarlaıdy QazAqparat tilshisi.
Zań jobasy Parlament depýtattarynyń bastamashylyǵymen ázirlendi.
Qujat tabıǵı, tehnogendik jáne áleýmettik sıpattaǵy tótenshe jaǵdaılar týyndaǵan ári tótenshe jaǵdaı engizý kezinde eldi azyq-túliktik astyqpen kepildi túrde qamtamasyz etý máselesin retteý, «Azyq-túlik kelisimshart korporatsııasy» Ulttyq kompanııasy» AQ-nyń astyqtyń rezervtik qoryn saqtaý shyǵyndaryn óteý, onyń AÓK-degi mártebesi men rólin aıqyndap, azyq-túlik qaýipsizdigin qamtamasyz etýdi kózdeıdi.
«Búginde azyq-túlik qaýipsizdigi astyqpen tolyǵymen qamtylǵan memleketter úshin de óte ózekti máselege aınalyp otyr. Sondyqtan da, astyq óndirýdegi elimizdiń joǵary resýrstyq áleýetine qaramastan, halyqty azyq-túlikpen qamtý jáne baǵany turaqtandyrýda memlekettiń jaýapty is-áreketteri mańyzdy. Zań jobasynda «astyqtyń rezervtik qory», «astyq naryǵy jónindegi operator», «astyqtyń rezervtik qoryn basqarý» uǵymdaryn engizý kózdelgen. Sondaı-aq, ýákiletti organǵa astyq naryǵyn retteýde tıisti quzyrettilik berý usynylady», - dedi Senat depýtaty Dúısenǵazy Mýsın.
Sonymen qatar, zań jobasynyń normalary ishki astyq naryǵyn turaqtandyrýǵa, tuqym jáne jemshóp qorlaryn qalyptastyrý arqyly birqatar salanyń ónimdiligin arttyrýǵa áser etedi dep josparlanǵan.
«Zań jobasyndaǵy tolyqtyrýlar ishki astyq naryǵyna retteýshilik áser etip, óńirlik turaqtandyrý qorlaryn qalyptastyrýǵa járdemdesý arqyly halyqty qoljetimdi astyq ónimderimen qamtamasyz etýge baǵyttalǵan. Zań jobasyn qabyldaý teris áleýmettik-ekonomıkalyq jáne quqyqtyq saldarǵa ákep soqtyrmaıdy, sonymen qatar, astyqtyń rezervtik qoryn saqtaý úshin respýblıkalyq bıýdjetten jyl saıyn 2,4 mlrd teńge kóleminde qarjylandyrýdy talap etedi», - dedi senator.
