Senat ındýstrııalyq sektordy qoldaýǵa arnalǵan jańa zań jobasyn ázirlep jatyr
QARAǴANDY. KAZINFORM — Qazaqstannyń mashına jasaý salasy tereń jańǵyrý kezeńine qadam basty. Senat salanyń júıeli túıtkilderin sheship, onyń básekege qabilettiligin kúsheıtetin keshendi zań jobasyn daıyndap jatyr.
Máýlen Áshimbaev mashına jasaý baǵytyndaǵy syn-qaterler men damý áleýetteri talqylanǵan dóńgelek ústel jumysyna qatysyp, salanyń álsiz tustaryn atap ótti.
Onyń aıtýynsha, búginde Qaraǵandy oblysy qýatty ónerkásiptik bazasy men metallýrgııamen ıntegratsııasynyń arqasynda eldiń mashına jasaý kesheninde jetekshi orynǵa ıe. Alaıda bul artyqshylyqtarǵa qaramastan, sheshimin kútetin mańyzdy máseleler áli de bar. Olardyń qatarynda — ımportqa táýeldilik, bilikti kadrlar tapshylyǵy, tehnologııalyq jáne tsıfrlyq kemshilikter.
— Búgin biz elimizde Prezıdent Qasym-Jomart Kemeluly Toqaevtyń bastamasymen mashına jasaýdyń belsendi damyp kele jatqanyn kórip otyrmyz. Osyǵan baılanysty birqatar máselelerdi sheshý mańyzdy. Solardyń biri – qoljetimdi qarjylandyrýdy qamtamasyz etý jáne ınvestıtsııa tartý. Osy jáne basqa da máselelerdi sheshý maqsatynda Senat mashına jasaýdy qoldaýǵa arnalǵan jeke zań jobasyn ázirledi. Jalpy, Qazaqstandaǵy mashına jasaý salasy aıtarlyqtaı áleýetke ıe. Ony júzege asyrý úshin memlekettik organdar, bıznes, ǵylym jáne bilim júıesiniń tıimdi birlesken jumysy qajet. Mundaı yntymaqtastyq básekege qabiletti óndiristerdi qalyptastyrýǵa, oqshaýlaýdy arttyrýǵa jáne qazirgi zamanǵy, tıimdi ári eksportqa baǵyttalǵan mashına jasaý salasyn damytýǵa múmkindik beredi, – dedi Palata tóraǵasy óz sózinde.
Depýtattar jumys sapary barysynda óńirdiń birneshe iri kásipornynda óndiris tehnologııalarymen jáne ónim sapasymen egjeı-tegjeıli tanysty. Sapardyń negizgi aktsenti — óndiristiń tıimdiligi men qaýipsizdigin aıqyndaıtyn zamanaýı tsıfrlyq sheshimder boldy. Sonyń ishinde 2024 jyly ashylǵaly beri kompanııanyń tsıfrlyq transformatsııasynyń basty ózegine aınalǵan Qarmet dıspetcherlik-taldaý ortalyǵy erekshe ataldy.
Kompanııa basshylyǵynyń habarlaýynsha, ortalyq Qarmet-tiń barlyq kómir óndirý nysanyn táýlik boıy baqylap otyrady. Jabdyqtyń jaǵdaıy, óndiris pen qaıta óńdeý parametrleri, tehnologııalyq qondyrǵylardyń jumysy, sondaı-aq ónerkásiptik qaýipsizdik kórsetkishteri naqty ýaqyt rejıminde qadaǵalanady. Sondaı-aq kólik qozǵalysy men energetıkalyq ınfraqurylymnyń jumysyn baqylaýǵa aıryqsha kóńil bólingen.
Biregeı dıspetcherlik júıe mamandarǵa óndiristik kórsetkishterdegi ózgeristerge jedel áreket etýge, yqtımal aqaýlardyń aldyn alýǵa jáne protsesterdi ońtaılandyrýǵa múmkindik beredi. Mundaı tásil, saparǵa qatysýshylar atap ótkendeı, kásiporyndardyń jalpy tıimdiligin aıtarlyqtaı arttyryp, apattyq jaǵdaılardyń aldyn alýǵa baǵyttalǵan qosymsha tetikterdi qalyptastyrady.