Senat halyqtyń múliktik quqyqtaryn qorǵaýdy jetildirýge baǵyttalǵan zańdy qabyldady
NUR-SULTAN. QazAqparat – Parlament Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine kúzet qyzmeti máseleleri boıynsha ózgerister men tolyqtyrýlar engizý týraly» Zańyn eki oqylymda qarap, qabyldady, dep habarlaıdy QazAqparat tilshisi.
Bul zań jobasy Qazaqstan Respýblıkasy Parlamenti depýtattary bastamashylyǵymen daıyndaldy. Zań jobasynyń basty maqsaty - kúzet qyzmetterin kórsetý sapasyn arttyrý, azamattardyń qaýipsizdigin qamtamasyz etý jáne osy saladaǵy qoldanystaǵy zańnamanyń qaıshylyqtaryn joıý. Zań jobasy Eńbek kodeksine, «Kúzet qyzmeti týraly», «Іshki ister organdary týraly» men «Ruqsattar jáne habarlamalar týraly» zańdarǵa túzetýler engizýdi qarastarady.
«Kúzet qyzmetiniń sapasyn arttyrý jáne mańyzdy obektiler men terrorıstik turǵydan osal obektilerdiń senimdi qorǵalýyn qamtamasyz etý maqsatynda «Ruqsattar jáne habarlamalar týraly» Zańǵa túzetý engizildi. Atap aıtatyn bolsaq, qaýipti óńdiristik, tirshilikti qamtamasyz etý obektilerde, bilim berý, iri saýda ortalyqtary, ákimshilik ǵımarattar sııaqty kópshilik kóp shoǵyrlanatyn obektilerde qyzmet jasaý úshin joǵary talaptarǵa sáıkes keletin kúzet uıymdaryna ruqsat berý usynylady. Mundaı kúzet uıymdarda joǵary materıaldyq jabdyqtar, jedel áreket etý toptary, ortalyq basqarý pýlty jáne tájirıbeli mamandar bolý qajet», - dedi Májilisiniń depýtaty Arman Qojahmetov zań jobasyn birinshi oqylymda talqylaý barysynda.
Osyǵan baılanysty kúzet qyzmetimen aınalysýǵa arnalǵan lıtsenzııa eki kishi túrge bólinedi. Birinshi kishi túri tek qana terrorıstik turǵydan osal obektilerge jatpaıtyn obektilerdi kúzetýge quqyq beredi. Ekinshi kishi túri boıynsha – kúzet qyzmetiniń barlyq túrlerin, sonyń ishinde terrorıstik turǵydan osal obektilerdi kúzetýge bolady. Osylaısha lıtsenzııalyq irikteý obekttik qaǵıdaty boıynsha júzege asyrylady.
Jalpy otyrysta qujatty ekinshi oqylymda qaraý kezinde senator Lázzat Súleımen zań jobasy kúzet qyzmetterin kórsetý sapasyn arttyrýǵa, azamattardyń, zańdy tulǵalardyń múliktik jáne jeke quqyqtaryn qorǵaýdy jetildirýge, tıisti normalardy qoldanystaǵy zańnamaǵa sáıkes keltirýge baǵyttalǵanyn atap ótti.
«Jeke kúzet uıymdary azamattar men zańdy tulǵalǵalardyń ómirin, densaýlyǵyn jáne múlkin qorǵaý, quqyqtyq tártipti qamtamasyz etýde memlekettik organdarǵa belsendi kómek kórsetip keledi. Usynylatyn normalar kúzet qyzmetteriniń sapasyn arttyrý, strategııalyq, asa mańyzdy obektiler men terrorıstik turǵydan osal obektilerdiń senimdi qorǵalýyn qamtamasyz etý úshin kúzet qyzmetimen aınalysýǵa arnalǵan lıtsenzııaǵa talapty kúsheıtýge baǵyttalǵan. Joǵaryda atalǵan qyzmet túrlerimen aınalysatyn kásipkerlik sýbektilerine talap kúsheıtilmek», - dedi L. Súleımen.
