Senat halyqaralyq kommertsııalyq tórelik qyzmeti týraly jobany Májiliske qaıtardy
ASTANA. Qazannyń 22-ci. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda «QR keıbir zańnamalyq aktilerine memlekettiń jáne onyń menshiginiń ımmýnıteti, aralyq sottar jáne halyqaralyq
kommertsııalyq tórelik qyzmetin jetildirý máseleleri boıynsha ózgerister men tolyqtyrýlar engizý týraly», zań jobasy ekinshi oqylymda talqylanyp, qujat Májiliske qaıtaryldy, dep habarlaıdy QazAqparat.
Zań jobasyn ázirleý qajettigi qoldanystaǵy ulttyq zańnamada tórelik jáne aralyq organdardyń, sondaı-aq daýlardy sheshý tásili retinde tórelik nemese aralyq sottar is qaraý rásimin tańdaý kezindegi problemalar týǵyzatyn qarama-qaıshy normalardyń oryn alýyna baılanysty týyndaǵan. Osyǵan oraı, qujat boıynsha Qazaqstannyń qoldanystaǵy Azamattyq jáne Azamattyq is júrgizý kodeksterine túzetýler engiziledi.
Budan basqa, zań jobasy halyqaralyq tórelik jáne aralyq is qaraýdan memlekettiń jáne onyń múlkiniń ımmýnıtetin retteýge baǵyttalady. Sondaı-aq qujatqa baılanysty aralyq sottyń jáne kommertsııalyq tóreliktiń quzyretin shekteý, sheshimderdi qoldanysqa engizý, oryndaý jáne toqtata turý sekildi sharalar qamtylatyn bolady.
Parlament Senaty Májilis maquldaǵan jobaǵa birqatar ózgerister engizdi. «Atap aıtqanda, oryn alǵan daýlardy halyqaralyq kommertsııalyq tóreliktiń sheshýine bergen jaǵdaıda ótinishti qaraýsyz qaldyrý usynylyp otyr. Budan basqa, zııandy óteý týraly daýlar boıynsha «zalal», «zııan» degen uǵymdardy naqtylaı tústik» dedi senator Serik Aqylbaı.
