Senat halyq densaýlyǵyna qatysty kodeks jobasyn Májiliske qaıtardy
NUR-SULTAN. QazAqparat - Búgin QR Parlamenti Senatynyń jalpy otyrysynda «Halyq densaýlyǵy jáne densaýlyq saqtaý júıesi týraly» kodeks jobasy men ilespe zań jobasy talqylandy, dep habarlaıdy QazAqparat tilshisi.
Talqylaý barysynda senatorlar tarapynan usynylǵan ózgerister men tolyqtyrýlar eskerile otyryp, qujat Májiliske qaıtaryldy.
Osy oraıda Senat tóraǵasy Máýlen Áshimbaev qaralǵan kodeks pen ilespe zań jobasy otandyq densaýlyq saqtaý salasyn damytýǵa jańa serpin beretinin atap ótti.
«Kodeks jobasy Senattyń barlyq komıtetterinde jan-jaqty ári muqııat pysyqtaldy. Qoǵamda talqylanyp jatqan ózekti máseleler qaralyp, utymdy pikirler aıtyldy. Soǵan sáıkes, Senat «Halyq densaýlyǵy jáne densaýlyq saqtaý júıesi týraly» kodeks jobasyna jáne ilespe jobaǵa birqatar mańyzdy túzetýler engizdi. Olar, eń aldymen, Memleket basshysynyń Ulttyq qoǵamdyq senim keńesiniń úshinshi otyrysynda bergen densaýlyq saqtaý salasyna qatysty tapsyrmalaryn iske asyrýǵa baǵyttalǵan. Atalǵan kodeks jobasy ult densaýlyǵyn nyǵaıtýmen qatar, medıtsına qyzmetkerleriniń quqyǵyn qorǵaý sııaqty birqatar mańyzdy basymdyqtardy qamtıdy. Aldaǵy ýaqytta bul qujat otandyq medıtsınanyń órkendeýine óz úlesin qosady dep senemiz», – dedi Máýlen Áshimbaev.
