Senat halyqtyń kóshi-qonyna qatysty zańdy Májiliske qaıtardy
ASTANA. KAZINFORM – Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine halyqtyń kóshi-qony jáne qylmystyq-atqarý júıesi salalaryndaǵy zańnamany jetildirý máseleleri boıynsha ózgerister men tolyqtyrýlar engizý týraly» Zańy ekinshi oqylymda qaraldy. Senat zańnyń jekelegen baptaryn jańa redaktsııada usynyp, ony Májiliske qaıtardy.
Parlament depýtattarynyń bastamasymen ázirlengen Zań halyqtyń kóshi-qony jáne qylmystyq-atqarý júıesi salasyndaǵy zańnamany jetildirýge baǵyttalǵan.
«Qarastyrylyp otyrǵan zań Senat depýtattary, múddeli memlekettik organdardyń qatysýymen 10 jumys tobynyń, bas komıtettiń keńeıtilgen otyrystarynda jan-jaqty talqylanyp, qarastyryldy.
Zańdy talqylaý jáne ony ekinshi oqylymǵa daıyndaý barysynda zańdy jetildirýdi kózdeıtin mańyzdy ózgerister men tolyqtyrýlar engizildi. Barlyq usynystar men eskertýler 11 túzetýden turatyn salystyrmaly kestege jınaqtalyp, senatorlardyń nazarlaryńyzǵa usynylyp otyr. Olardy atap aıtatyn bolsaq, quqyqtyq qaıshylyqty boldyrmaý maqsatynda Jer kodeksine qonys aýdarýshylarǵa konkýrstan tys tártippen sharýa nemese fermer qojalyǵyn júrgizý úshin beriletin jer ýchaskeleriniń merzimderine qatysty tolyqtyrýlar engizildi. Sonymen qatar, QR Qylmystyq kodeksi 428-1-babynyń ekinshi bóligi boıynsha qylmystyq-atqarý júıesiniń, tergeý ızolıatorlarynyń, ýaqytsha ustaý ızolıatorlarynyń qyzmetkerleri óziniń qyzmettik jaǵdaıyn paıdalana otyryp, qylmys jasaǵan jaǵdaıda eki jyldan bes jylǵa deıingi merzimge bas bostandyǵynan aıyrý túrindegi qylmystyq jaýaptylyq qatańdatylyp, jazanyń balama túrleri alynyp tastaldy», - dedi senator Sovetbek Medebaev.
Munymen qosa, beınebaqylaý júıelerin qasaqana joıǵany nemese búldirgeni úshin qylmystyq jaýaptylyqtyń engizilýine baılanysty Qazaqstan Respýblıkasynyń Qylmystyq-atqarý kodeksine beınebaqylaý júıesi uǵymyn engizý bóliginde túzetýler jasaldy.
«Halyqtyń kóshi-qony týraly» QR Zańyna zańnama talaptarynyń saqtalýyn memlekettik baqylaý týraly derbes taraýdyń engizilýine baılanysty Zańnyń jekelegen normalary QR Kásipkerlik kodeksiniń jáne «Qazaqstan Respýblıkasynyń keıbir zańnamalyq aktilerine bıznes júrgizý máseleleri boıynsha ózgerister men tolyqtyrýlar engizý týraly» QR Zańynyń normalaryna sáıkes keltirildi.
«Sonymen qatar, osy zańmen, aýyr nemese asa aýyr qylmystar jasaǵan sheteldikterdiń Qazaqstan Respýblıkasyna kelýine tyıym salatyn negizder keńeıtilip otyr. Osyǵan baılanysty qylmystyq-protsestik kodekstiń normalaryna sáıkes keltirý maqsatynda, «Sheteldikterdiń quqyqtyq jaǵdaıy týraly» jáne «Halyqtyń kóshi-qony týraly» QR zańdaryna tıisti tolyqtyrýlar engizildi», - dedi senator.
