Senat halyqaralyq mindettemelerdi oryndaýǵa qatysty qujatty maquldady
ASTANA. KAZINFORM – Búgin Senattyń jalpy otyrysynda «Mamandandyrylǵan mekemelerdiń artyqshylyqtary men ımmýnıtetteri týraly konventsııaǵa Qazaqstan Respýblıkasynyń eskertpesin jáne málimdemesin alyp tastaý týraly» Zańy maquldandy.
- Zań Qazaqstan Respýblıkasynyń halyqaralyq mindettemelerin tolyq kólemde oryndaýǵa jáne atalǵan Konventsııanyń elimiz úshin tolyq kólemde kúshine enýin qamtamasyz etýge baǵyttalǵan. 1947 jylǵy 21 qarashadaǵy Mamandandyrylǵan mekemelerdiń artyqshylyqtary men ımmýnıtetteri týraly konventsııa - Birikken Ulttar Uıymynyń mamandandyrylǵan mekemeleriniń quqyqtyq mártebesin aıqyndaıtyn jáne olardyń táýelsiz ári tıimdi qyzmetin qamtamasyz etetin negizgi halyqaralyq-quqyqtyq qujattardyń biri. Konventsııa mamandandyrylǵan mekemelerdiń múlki men aktıvterine qatysty artyqshylyqtardy, salyq jáne kedendik jeńildikterdi, sondaı-aq olardyń laýazymdy tulǵalaryna beriletin ımmýnıtetter men kepildikterdi belgileıdi, - dedi senator Amangeldi Nuǵmanov.
Onyń sózine qaraǵanda, Qazaqstan Respýblıkasy Konventsııany 2020 jyly ratıfıkatsııalaý kezinde Konventsııanyń VI babynyń 19-bóliminiń tarmaqshalaryna qatysty eskertpe jáne III babynyń 9-bóliminiń tarmaqshalaryna qatysty málimdeme jasaǵan bolatyn.
- Atap aıtqanda, engizilgen eskertpege sáıkes, mamandandyrylǵan mekemelerdiń laýazymdy tulǵalaryna beriletin jekelegen artyqshylyqtar Qazaqstan Respýblıkasynyń azamattaryna qoldanylmaıtyn bolyp belgilendi. Sonymen qatar, Qazaqstan Respýblıkasy Konventsııanyń III babynyń 9-bóliminiń tarmaqshalaryna qatysty «kedendik alymdar» uǵymyn ulttyq zańnamaǵa sáıkes túsinetindigi týraly málimdeme jasaǵan bolatyn. Nátıjesinde, Birikken Ulttar Uıymynyń halyqaralyq mamandandyrylǵan mekemeleriniń basym bóligi Qazaqstan Respýblıkasynyń eskertpesi men málimdemesine qarsylyq bildirdi. Qarsylyqtardyń negizgi sebepteri retinde atalǵan shekteýlerdiń Konventsııanyń tehnıkalyq nemese rásimdik normalaryna emes, onyń negizgi quqyqtyq mazmunyna qatysty ekeni kórsetildi. Sonymen qatar, mamandandyrylǵan mekemeler engizilgen eskertpe men málimdeme uıymdardyń qarjylyq jáne ákimshilik táýelsizdigin qamtamasyz etetin negizgi kepildikterge, sondaı-aq olardyń qyzmetkerleriniń quqyqtyq mártebesine tikeleı áser etetinin atap ótti. Osyǵan baılanysty Birikken Ulttar Uıymynyń Quqyqtyq máseleler jónindegi basqarmasy Qazaqstan Respýblıkasyna atalǵan eskertpe men málimdemeni keri qaıtaryp alý múmkindigin qarastyrýdy usyndy, - dedi depýtat.
Halyqaralyq quqyqtyq praktıkaǵa sáıkes, mundaı sıpattaǵy eskertpeler men málimdemeler tıisti mamandandyrylǵan mekemelerdiń kelisiminsiz tolyqqandy quqyqtyq saldar týyndatpaıdy. Sondyqtan Qazaqstan Respýblıkasy engizgen eskertpe men málimdemeni keri qaıtaryp almaıynsha, Konventsııanyń elimiz úshin tolyq kólemde kúshine ený máselesi ashyq kúıinde qalyp otyr.
- Bul rette Konventsııanyń V babyna saı 16-bólimde artyqshylyqtar men ımmýnıtetterdiń jekelegen tulǵalardyń jeke paıdasy úshin emes, mamandandyrylǵan mekemelerdiń óz fýnktsııalaryn táýelsiz ári tıimdi oryndaýyn qamtamasyz etý maqsatynda beriletini naqty belgilengen. Bul rette, Konventsııada kózdelgen artyqshylyqtar men ımmýnıtetter absolıýtti sıpatqa ıe emes. Olar halyqaralyq uıymdardyń qyzmettik mindetterin oryndaýyna qajetti kólemde ǵana qoldanylady jáne memleketterdiń zańdy múddeleri men halyqaralyq uıymdardyń táýelsiz qyzmeti arasyndaǵy teńgerimdi qamtamasyz etedi. Osyǵan baılanysty buryn engizilgen eskertpe men málimdemeni saqtaýdyń quqyqtyq ári praktıkalyq qajettiligi búgingi kúni ózektiligin joǵaltty. Memleket basshysy Qazaqstannyń halyqaralyq uıymdarmen ózara is-qımylyn keńeıtýge jáne halyqaralyq bastamalaryn ilgeriletýge erekshe mán berip keledi. Osy turǵydan alǵanda, atalǵan zańdy qabyldaý Qazaqstan Respýblıkasynyń halyqaralyq mindettemelerin tolyq oryndaýyn qamtamasyz etedi, Birikken Ulttar Uıymy júıesindegi mamandandyrylǵan mekemelermen yntymaqtastyqty nyǵaıtady, sondaı-aq elimizdiń jaýapty ári senimdi halyqaralyq seriktes retindegi bedelin odan ári arttyrýǵa yqpal etedi, - dedi senator.
Eske salsaq, bul zańdy Parlament Májilisi osy jyly mamyr aıynda qabyldaǵan edi.
