Senat ǵylymdy damytý men dárini tirkeý normalaryna qatysty qujatty qaraıdy
ASTANA. KAZINFORM — Búgin Parlament Senatynyń jalpy otyrysynda saılaý rásimderin jetildirý, salyq zańnamasyna ózgeris engizý, ǵylymdy damytýǵa qatysty zańdar qaralady.
Senatorlar «Qazaqstan Respýblıkasynyń keıbir zańnamalyq aktilerine olardy QR Konstıtýtsııasyna sáıkes keltirý, Qazaqstannyń saılaý, prokýratýra jáne áleýmettik qamsyzdandyrý týraly zańnamasyn jetildirý máseleleri boıynsha ózgerister men tolyqtyrýlar engizý týraly» zańy men oǵan ilespe qujatty birinshi oqylymda talqylaıdy.
Atalǵan qujattardyń negizgi maqsaty – zańnamalyq aktilerdi jańartylǵan Konstıtýtsııa talaptaryna sáıkestendirý, saılaý rásimderin jetildirý jáne ulttyq zańnamanyń jekelegen salalaryn odan ári damytý.
Budan bólek, jalpy otyrysta «Qazaqstan Respýblıkasynyń Salyq kodeksine ózgerister engizý týraly» qujat birinshi oqylymda qaralady.
Bul qujatty mamyr aıynda Parlamet Májilisinde talqylaý kezinde jańa normalardyń bir parasy salyq zańnamasyna Quryltaı, Qazaqstan Halyq keńesi sııaqty jańadan qurylatyn ınstıtýttardy engizýge baǵyttalatyny aıtyldy.
— Bul zań 15 naýryzdaǵy respýblıkalyq referendým qorytyndysy boıynsha Konstıtýtsııaǵa engizilgen túzetýler men ózgeristerdi, Konstıtýtsııalyq sot týraly Konstıtýtsııalyq zańǵa engizilgen túzetýlerdi iske asyrý maqsatymen ázirlendi. Qujatta aımaq ataýlaryn kórsetý tártibin Astanaǵa basymdyq bere otyryp retteý usynylady. Azamattardyń Konstıtýtsııalyq sotqa júgingen kezde tólenetin memlekettik bajdy alyp tastaý usynylady, — dedi Májilis depýtaty Erlan Stambekov.
Senatta talqylanatyn kelesi qujat - «Qazaqstan Respýblıkasynyń keıbir zańnamalyq aktilerine Qazaqstan Respýblıkasy arnaýly memlekettik organdarynyń qyzmeti máseleleri boıynsha ózgerister men tolyqtyrýlar engizý týraly» Zańy.
Munymen qosa, jalpy otyrysta «Qazaqstan Respýblıkasynyń keıbir zańnamalyq aktilerine ǵylym, ǵylymdy qajetsinetin aýmaqtar, áleýmettik qamsyzdandyrý, bilim berý, densaýlyq saqtaý jáne áskerı qyzmet máseleleri boıynsha ózgerister men tolyqtyrýlar engizý týraly» Zańy birinshi oqylymda qaralady. Bul qujatty osy jyly sáýir aıynda Parlament Májilisi ekinshi oqylymda qabyldaǵan edi.
Atap aıtqanda, Memleket basshysy Qasym-Jomart Toqaev ǵylym qalalaryn qurý jóninde naqty tapsyrma bergen bolatyn. Sol tapsyrmany iske asyrý úshin zańǵa alǵash ret «ǵylymı aýmaq» uǵymy engizildi. Ol jeke eldi meken — ǵylym qalasy (Kýrchatov sııaqty) nemese ǵylymı-tehnologııalyq park formatynda bolýy múmkin. Bul — ǵylym, bilim jáne óndiris bir jerde toǵysatyn naqty quqyqtyq rejım bolmaq.
Mundaı aýmaqtar úshin qoldaýdyń tutas paketi de qarastyrylǵan:
- jeńildikter men erekshe jaǵdaılar;
- ınnovatsııalardy memlekettik qoldaý;
- arnaıy bilim berý granttaryn bólý;
- arnaıy ekonomıkalyq aımaq (AEA) mártebesin alý múmkindigi.
Sondaı-aq zań osy aýmaqtardy basqarýdaǵy Úkimettiń, mınıstrlikter men ákimdikterdiń ókilettikterin naqty belgileıdi. Іs júzinde tutas ekojúıe qalyptasady: ǵalymnyń zertteýinen bastap ony óndiriske engizý men kommertsııalandyrýǵa deıingi jol ashylady.
Munymen qosa, osy zań aıasynda dárilik zattardy tirkeý merzimi aıtarlyqtaı qysqartylady. Densaýlyq saqtaý mınıstrligine Dúnıejúzilik densaýlyq saqtaý uıymynyń tizimindegi ómirlik mańyzy bar dárilik preparattardy tirkeýdi derbes bastamashylyq etý quzyreti beriledi.
