Senat gaz jáne gazben jabdyqtaý týraly zańdy qabyldady
ASTANA. 7 jeltoqsan. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Gaz jáne gazben jabdyqtaý týraly» QR Zańyn qabyldady.
Qujat Memleket basshysynyń qol qoıýyna jiberiledi.
Atalǵan zań Qazaqstan Respýblıkasynyń gazǵa degen ishki suranystaryn tıimdi qamtamasyz etý úshin, sondaı-aq gazben jabdyqtaý júıesi nysandaryn tıimdi, senimdi jáne qaýipsiz paıdalaný úshin jaǵdaı jasaýdy kózdeıdi. Bul rette elimizdiń energetıkalyq jáne ekologııalyq qaýipsizdigin qamtamasyz etý, tutynýshylardyń barynsha keń aýqymyn irkilissiz gazben jabdyqtaýdy qamtamasyz etýge qatysty sharalar kózdeledi. Bunymen qosa, qujatpen respýblıkanyń otyn-energetıkalyq balansynda gaz úlesin arttyrý jáne ásirese, óndiriletin ilespe gazdy el muqtajdyqtaryna tıimdi paıdalaný sharalary qarastyrylady.
«Qujat Úkimet aıqyndaıtyn ulttyq operatordyń qyzmeti úshin zańnamalyq bazaǵa aınalady. Onyń negizgi mindetteriniń biri respýblıkanyń ishki qajettilikterin qamtamasyz etý basymdyǵy maqsatynda memlekettiń taýarly jáne shıkizatty gazdy satyp alýdyń basym quqyǵyn iske asyrý kózdeledi. Budan bólek, gazdandyrýdyń bas shemasyn ázirleý men bekitý josparlanyp otyr. Onyń máni boıynsha jumys istep turǵan gazben jabdyqtaý nysandaryn jańǵyrtý men jańalaryn salýdyń jospary jasalady. Gazdandyrýdyń bas shemasyn iske asyrý gazdyń ishki resýrstarynyń esebinen eldi gazdandyrý jónindegi strategııalyq mindetti sheshýge múmkindik beredi», - deıdi Munaı jáne gaz mınıstri Saýat Myńbaev.
Onyń aıtýynsha, qabyldanyp otyrǵan zań arqyly gazdyń ishki naryǵyndaǵy baǵany memlekettik retteý tártibi bekitiledi. Bul rette taýarlyq jáne suıytylǵan gaz úshin Úkimet bekitetin shekti kóterme saýda baǵasyn engizý kózdelgen.
Jalpy alǵanda zań osy saladaǵy memelkettik retteýdiń negizgi maqsattaryn, qaǵıdattary men mindetterin aıqyndaıdy. Atap aıtqanda, taýarlyq gazdy, suıytylǵan munaı men suıytylǵan tabıǵı gazdy tasymaldaýdy, saqtaýdy, ótkizýdi esepke alýdy memlekettik retteý, ishki naryqta gazdy kóterme saýdada ótkizý baǵalaryn memlekettik retteý sharalary qamtylady.
